Zuu din hi ttihnung tuk, cancer phunphun a chuahter

American Ngandamnak Mekazin (Health magazine) nih, “a caan caan te i zuu din hmanh nih cancer zawtnak phun tampi a chuahter,” tiah a ttial.

US ram ah cancer zawtnak a chuahter tu bik cu ‘kuak zuk’ asi. US ram chungah cancer in a zawmi 90% cu kuak zuk ruang lawngte ah asi.

Chinmi hi kuak zumi kan tam taktak. Hrial cang hna usih.

Mah bantukin zuu din zong hi ttih a rak nung tuk. Hawikom he a caan te rawl ei tti caan i zuu (wine, beer, whisky, cocktail, cider, etc.) din hmanh nih hin cancer zawtnak a chuahter.

Zuu nih cancer zawtnak a chuahtermi hna lakah cheukhat cu;

  • hrom cancer,
  • pawpi le hrom aa tonnak (oesophagus) cancer,
  • kaa cancer,
  • aw chuahnak kuang (larynx) cancer,
  • thin cancer,
  • Rilpi cancer, tbk., pawl hi an si.

American Cancer Society (ACS) nih, “zuu din nih pawpi cancer le pancreatic cancer zong a chuahter khawh,” tiah a thanh.

Na pawngkam ah zuu a dingmi pawl zoh hna hmanh, acunglei kan langhtermi pawl hi an tuar maw? Hi bantukin a thimi zuu ding na thei hna maw?

“Zarh 1 ah wine dur 1 peng na din hmanh ah cancer na ngei kho,” tiah BMC Public Health nih a langhter.

“Mi tampi nih zuu din ruang i cancer le zawtnak phunphun a chuahmi hi an hngal lo. Mipi nih an theih khawhnak hnga chimphuan cio hi a biapi tuk,” tiah National Institute of Health (NIS) tangum Division of Cancer Control ah a ttuanmi Dr (PhD) Kara Wiseman nih a chim.

Zawtfah tikah zei tlukin dah lungre a theih. Sizung kalnak caah chan chung ttuanmi tangka le innlo tiang zuar dih a haumi zong an um.

Na dawtmi sinah mah ca hi kua ve.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.