22.3 C
Hakha
Wednesday, February 19, 2020
More

    Zomi Miphun Ni tiin tuahnak nawl pek lo ruangah Tonzang ah Chin Miphun Ni an tuah lai lo

    Follow Us

    99,952FansLike
    440SubscribersSubscribe

    Ṭial Tharmi

    - Advertisement -

    Tonzang khua ah February 20 cu Zomi Miphun Ni (Zomi National Day) tiin tuahnak nawl an pek hna lo ruangah tu kum Chin Miphun Ni cu an tuah kho lai lo, tiah kan theih.

    Tonzang khua Zomi Mino Bu nih “High School certual ah Zomi Miphun Ni tuah” dingin Penguk Committee sinah January 3 ah nawl a hal.

    January 21 ah Tonzang Penguk Committee joint secretary U Nay Lin Soe nih, “khual lian a ngei ding kan si i a hlankan in timhtuah a hauh caah certual hman nak nawl pek awk nan ṭha lo,” tiah a leh hna.

    Mah kong he pehtlai in, Tonzang khua Zomi Mino Bu hruaitu Pu Pu Thang nih, “January 15 ah Penguk Zung ah joint secretary nih aa ka auh i aa ka fianh. Zomi Miphun Ni tiin nawl pek ding cu a si kho lo. Biakinn area lole pumpak inntual ah tuah ahcun a poinak um lo. Mipi ngeihmi hmunhma ahcun Zomi Miphun Ni tuahnak nawl kan in pe kho hna lo aa ka ti,” tiah a chim.

    “February 19 lole 20 ah Tonzang ah Daw Aung San Suu Kyi a ra lai tiah thawngpang kan theih. Liamcia kum 3 hrawngah cozah zunglei hruainak in Zomi Miphun Ni tiin puai an rak tuah ko. Kum dang ahcun zeihmanh piahtana um lo.

    “Tu kum ceo ah Zo le mi fonh in ṭial a duhmi le hlat in ṭial a duhmi an hung chuak i piahtana fakpi a chuak. Anmah zong nih mah cu kutdong sawh in an chim. Tu kum cu keimah zong khual tlawn ka hau i kan tuah lawlaw lai lo.

    “Biakinn area ah va tuah zongah mah cafang fonh le hlat kongah lungrual lonak a chuak kho. Hi cu kan khua le hawi khua aa dannak te si ve kan ti ko lai ta,” tiah a chimchap.

    Mah kong cu Tonzang penguk Salai Thawng phone kan chawnh nain “thil sining vialte anmah sinah kan fianh dih cang hna” ati i phone a chiah.

    Tedim khua i mino hruaitu a simi Nung Sian Tuang nih, “tu kum cu biaknak lei nih an tuah lai. Aruang cu Cope Centenary Jubilee puai ah khuazei ram kan phak zongah February 20 cu kanmah hruainak in kan tuah lai tiah biakamnak an tuah. Cope kum 100 tlin philhlonak hall, biaknak lei nih ngeihmi hmun ah tuah an timh caah cozah sinah tuahnak nawl zong an hal lo,” tiah a chim.

    “Kum dang ahcun sang le cozah upa i bawm in tuah asi tawn. Tutan cu cozah hruainak in an tuah lai ti ka thei rih lo,” ati.

    Charhchan: Zalen

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.