Kawl miphun ttanh pawl nih May 14 le 15 ah duh lonak lam an zawh ruangah nawl ngeitu nih Yangon khuapi i South Dagon Township ah Muslim pawl nih thlacamnak ah an hmanmi inn 2 le thil thitnak sehzung 3 an khar.

Muslim pawl cu an thlathiang (Ramadan) ah nifatin thla an cam lio ah Kawl miphun ttanh 200 hrawng nih South Dagon Township i an thlacamnak hmun 5 ah duh lonak an langhter.

Muslim thlacam pawl cu pengkulh cozah zungah an auh hna i thla an cam tawnnak inn 2 le thil tthitnak sehzung 3 ah thlacam ti lo dingin le meeting tuah ti lo dingin biakamnak min an thutter hna.

South Dagon Township chung ahhin Muslim biakinn pakhat hmanh a um lo ruangah Muslim pawl nih an thla thiang caan ahhin thlacamnak hmun ca ah pengkulh cozah sinah nawl halnak an tuah tawn.

Pengkulh cozah nih Muslim pawl cu inn 2 le thil tthitnak sehzung 3 ah May 5 in June 5 tiang thlacamnak hmun ah hmang dingin nawl a pek hna tiah theih a si.

Asinain, khuami nih thlacamnak ah an hmanmi inn le sehzung cu nawlonhnak tel loin an biakinn ah an i ser an ti i kharpiak dingin cozah an hnek tuk ruangah cozah nih miphun le biaknak he aa pehtlaimi buainak a chuak sual lai ti a phan ruangah a kharpiak hna hi a si.

Yangon ramtthen cozah lutlai Pyo Min Thein thangchiat ruangah thong a rak tla balmi Michael Kyaw Myint nih ‘Kan thimmi cozah hi kan biaknak caah santlai lo a si. Tuzaan ah South Dagon um Muslim biakinn cu kan hrawh lai,” tiah a au len.

Duh lonak lam a zawhtu pawl cu thingtan, nam an i ken hna tiah mit hmut nih an chim.

Tuni ahkhan miphun dawtu aa timi bu pakhat nih Muslim pawl an tuahtomi hna kongah kan lungtlinglo ti langhter can ah Muslim pawl cu rose pangpar rang an pek hna. _ MMT