VIDEO tehte: Rung Lian Ceu hi “Chin Paih” zulhphung ning cun a sunglo

Rung Lian Ceu hi

Chin Paih World Champion Rung Lian Ceu cu March 7 ah India ram, Nagaland state khualipi Kohima ah tuahmi 12nk Hunmi Naga Paih Zuamnak ah champion a ngah lo.

Aruang cu Naga Paih le Chin Paih hi zulhphung aa lawh lo caah a si. Chin Paih ahcun “keeng” in tlak lawngah tei a si caah an keeng in an tlaknak hnga lo an ttaang le phei in an i ven.

Naga Paih ahcun ttaang le phei in tlak zong tei ah an chiah caah semi-final ah Rung Lian Ceu a sungh i 3nk lawng a ngah hi si. An Paih zulhphung a si ve caah Naga Paih ahcun a sung ko, nain Chin Paih ahcun a sung hrimhrim lo.

Hi bantuk zulhphung cu Rung Lian Ceu nih a theih balmi le a cawn balmi a si lo. Kohima khuapi a phanh hnu, paih hlan ni 2 aa duh ceo ah coach an pekmi pa nih a chimh i rianrang in a cawn chommi sikaw, aa ziak rih lo.

Rung Lian Ceu le Venozu hi Chin Paih zulhphung in i pai hna sehlaw Rung Lian Ceu nih a tei lai. Aruang cu Venozu nih Rung Lian Ceu hi a keeng in a thla kho lo. Rung Lian Ceu nih cun a thlak khawh tuk.

Atang video ah zoh ve

Mah buin Rung Lian Ceu nih lunglawm tein upa pawl biakhiahmi a cohlan, a lungput le a biachim hi pasal timi cu a si. Aa paih tik zongah ttha tein an kut a tlaih hna. Neek a nei lo, aa porhlaw lo. Zohchun awk a tlak taktak.

Rung Lian Ceu nih, “Nagaland ah ka caam chung vialte kaa nuam tuk. Naga pawl cu an ttha tuk i kaa nuam ngai. A biapi bikin chim ka duhmi cu, Nagaland ah rat tthan le Naga Paih ah i phomh tthan ka duh,” tiah a chim.

“Naga Paih tthawng pawl cu an thiam bak ko. An ngan tuk fawn i an tthawng tuk. Keimah nakin an ngan deuh tikah an langsar ngai, cun an tthawng taktak.

“Naga Paih zulhphung aa ka chimtu (coach) a um. Paih hlan ni 2 aa duh ah aa ka chimh. A ttha ngai i a nuam ngaingai,” tiah a chimchap.

Rung Lian Ceu bia an halnak cu minutes 1:18 in aa thok, atang video

Rung Lian Ceu cu 3nk laksawng India tangka Rupee ting 1 le Paih Thiam Bik Laksawng Rupee thong 10 an pek.

Chinmi paih thiam a si vemi Thawng Tling, Mang Hnin Thang, Tluang Zel Thang le Hrang Tin Thang zong tutan Naga Paih ah an i phomh ve nain an sung colh.

Rung Lian Ceu cu atu lio Naga Paih Champion Venozu he semi-final ah an i phomh i a keeng in a tla lo nain a phei le a ttaang in a tlak caah a sung. Chinmi caah cun i lungsak awk a har dom, nain Naga Paih a si bang anmah zulhphung hman a si caah a dik ko.

Atu lio Naga Paih Champion Venozu cu Menuosetuo Yiese he champion an i cuh i Menuosetuo Yiese nih a co.

Rung Lian Ceu nih a chim bang 13th Open Naga Paih ah aa phomh tthan ahcun a tei dih cang men hna lai. An zulhphung aa ziak cang lai caah a mak taktak lai.

Tu kum chung hmanh ah WPC nih Chin Paih tuah sehlaw Naga Paih champion pawl le Rung Lian Ceu hi “Chin Paih (Lai Paih)” bakin i phomh tthan hna seh ti duh a um ngai.


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.