VIDEO – Russia ser ‘minung bantuk robot’ a phortu vancunglawng cu ISS a phan cang

Moscow, Russia — Russia ser minung bantuk robot a phortu vancunglawng (spacecraft) cu vancung hmunlawng (aa-ka-tah) ah sakmi Ramkip Vancunglawng Dinhnak (International Space Station – ISS) ah tluang tein a phan cang.

‘Fedor’ tiin auhmi minung tia robot cu minung cawlcangh ning aa cawn kho. ISS rianttuan vancunglawng mong pawl ca i ttih a nungmi hmun pawl ah rianttuan cawnter dingin an thlahmi asi. Wire hri bunh, screw hrenh, meithahnak gas hman, tbk., a cawng lai.

“ISS he aa tong cang, tluang tein aa peh cang,” tiah NASA thawngthanhtu nih a thanh.

Minung cit lomi, Fedor phortu vancunglawng rocket in an thlah lio cu NASA nih TV in live a thlah. NASA thawngthanhtu nih “vancunglawng cu tluang hithiat tein Ramkip Vancunglawng Dinhnak (ISS) lei a panh thliahmah ko” ati.

Atu hi vancung hmunlawng (Kawl holh in aa-ka-tah) ah sakmi Ramkip Vancunglawng Dinhnak (ISS) chungah rianttuantu minung 6 an um lio asi. Minung bantuk robot he cun rianttuantu 7 an si cang lai.

Minung bantuk sehzuk a phortu vancunglawng (Kawl holh in aa-ka-tah-yin) cu Nilini ah Russia ram thlanglei i Kazakhstan khua um vancunglawng thlahnak hmun in an thlah. September 7 tiang ISS ah a um lai. ISS chung rianttuan vancunglawng mong (astronaut) pawl bawmh a cawng lai.

Vancunglawng cu Ramkip Vancunglawng Dinhnak (ISS) ah an thlah ahhin vancunglawng monghthiam nih an i cit i an mongh tawn. Atu ahcun minung pakhat hmanh cit loin zehzuk nih tluang tein ISS tiang a mongh khawh cang.

Ramkip Vancunglawng Dinhnak (ISS) a phak lio VIDEO

Fedor hi vancung hmunlawng ah thlah hmasa bikmi robot asi lo. 2011 ah US space bu NASA nih General Motors company he i bawm in an sermi minung bantuk robot ‘Robonaut 2’ a rak thlah. Ttihnungmi hmun ah rianttuanter dingin rak thlahmi asi ve. A seh rawh caah 2018 ah vawlei an ttumpi tthan.

2013 ah, Japan nih ‘Kirobo’ tiin minh an bunhmi robot hmete cu Japan vancunglawng mong bawi pakhat he ISS ah a rak kuat ve. Toyota company he i bawm in sermi robot asi. Anih cu bia zong ruah khawh a rak si nain Japan holh lawng in ngah.

Ramkip Vancunglawng Dinhnak (ISS) cu kum 1998 ah an rak serh khawh. Suimilaam 1 ah meng 17,000 rangin vawlei a hel peng.

Ramkip Vancunglawng Dinhnak cu cuttuh nganpi asi i a chungah minung umnak, vancunglawng dinhnak, tbk., aa tel.

Ramkip Vancunglawng Dinhnak (ISS) an serning

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.