VIDEO – President Trump: US ah nan i nuamh lo cun chuak ko uh, ka timi hna si

US President Donald Trump nih “Democrat MP/representative nu 4 ka timi hna kha mi cheu nih bia alnak ah nan i kuaih. Kan ram nan huat i kahin nan i nuamh lo cun nan chuak kho ko ka ti timi hna si,” tiah a chim.

Zarhpini ah President Trump nih, “a rawk dih cikcekmi le sualnak in a khatmi ram in a rami koko nih cutin khatin US cozah rianttuan seh tiah US mipi nan chimh lenmi hna hi cu a mak ko.

“Nan ratnak ram ah va kir ulaw a rawk dih cikcekmi le sualnak in a khatmi kha remh va bawm deuh hna uh,” tiah Twitter in Hlutdaw Niam i Democrat MP nu 4 a phomh hna.

MP nu 4 cu an i faksak tuk i Media Sin Thawngthanhnak (Press Conference) tiang an tuah i President Trump cu ‘miphun thleidan hmang, Mirang ttanh…’ tiah a phunphun in an ti.

Hlutdaw Niam lutlai nu Nancy Pelosi (Democrat MP) le milian tampi zong nih ‘miphun thleidan bak si’ tiah fakpi in Trump cu an soisel. UK Prime Minister May zong nih “Trump bia cu cohlan khawh ding asi lo” ati.

Mah kong he pehtlai in media pawl nih Trump cu bia an hal.

President Trump nih, “ka ttialmi kha miphun thleidan asi lo. Democrat MP/representative nu 4 kha US cozah rianttuan ning an doh peng. Tloksup in US cozah an soisel peng ruangah mah tluk in US nan huat le nan i nuamh lo cun nan chuak kho ko, ka timi hna si” tiah a chim.

“Somalia ram in a ra i atu MP a ttuanmi Ilhan Omar lebang cu aa nuam bal lo. Israel chiatnak lawngte a chim. Israel le Judah mi a huat hna. Aa thawh i US minung thong tampi an thihnak 9/11 kong hna ‘mi cheukhat nih thil zeimaw an tuah…’ tiah thil hmete bantukin a chim. World Trade Center a pahtu kha ‘mi cheukhat’ ti men ding an si lo. Bia fak deuh in ti khawh an si.

“America rammi tampi a thattu ralhrang al-Qaeda hna a thangtthat hna.

“MP Alenxandria zong nih ramri ah phungninglo ramdangmi kan tlaih i kan hrenmi hna kong ah fakpi in US cozah a soi peng.

“Mah tluk in US nan huat i US ah nan i nuamh lo ahcun chuak ko ngat uh, ka timi hna si. Miphun thleidan asi lo. Hi tluk in US a huat i US ah aa nuam lomi cu an chuak kho ko,” ati.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.