22.3 C
Hakha
Wednesday, February 19, 2020
More

    US ummi nih Myanmar um nan chungkhar lak khawh si ti lo

    Follow Us

    99,952FansLike
    440SubscribersSubscribe

    Ṭial Tharmi

    - Advertisement -

    US President Donald Trump nih Ningani (US caan) ah Myanmar telh in ram 6 cu US luh khammi (travel ban) cazin ah a khumh hna.

    Mah ruangah, US ummi nih Myanmar um nan chungkhar kha US ah peem dingin lak khawh an si ti lo.

    Yangon um US Tanzung nih, “2020 February 21 thokin Myanmar rammi pawl cu ‘US pemnak visa’ le ‘diversity visa lottery’ pek an si ti lai lo,” tiah thawng a thanh colh ve.

    “Nain, US tlawnnak (tourist visa), sianginn kainak (student visa), business visa, temporary worker visa, tbk., pawl cu voi dang tawn bantuk tein pek an si ko lai.

    “Cun, US pemnak visa a ngah cangmi paoh cu US luhter nan si ko lai. Policy thar ruangah visa pek cangmi chuh a um lai lo,” ati.

    Myanmar rammi cu US pemnak visa le diversity visa lottery pek lo ding, timi Trump policy thar nih harnak a pek hna mi hna cu;

    • Kawlram um na nupi/va kha US ah peem dingin auh khawh si ti lo
    • Kawlram um na nulepa kha US ah peem dingin auh khawh si ti lo
    • Kawlram um na nupi/vapa le fale kha US ah peem dingin auh khawh si ti lo
    • Kawlram ummi hohmanh US ah peem dingin auh khawh an si ti lo

    Nain, na nulepa nih US ah an in tlawn khawh ṭhiam. Myanmar um pastor le awṭha pawl cah khawh ṭhiam an si. Myanmar rammi paoh US tlawn (tourist visa) khawh ṭhiam asi. A tawifiannak in chim ahcun, peem asi lomi paoh cu a ngah peng ko.

    US um Chinmi tampi cu Myanmar um kan nulepa lak kan duh hna. Myanmar ah nupi le va a ngeimi zong kan um. US ah peem (um thai) dingin lak na duh hna ahcun sihni (lawyer) hlang law a ṭha.

    Chin refugee caah phan awk um lo

    Malaysia le India um Chin refugee pawl cu Trump travel ban nih a kan hnor lo. Voi dang tawn ning tein asi ko lai. Refugee kong hi cu UNHCR zong nih fianternak a tuahte ttheo lai tiah kan zumh.

    Nizaan ah President Trump nih US luh khammi cazin ah a telhmi ram 6 hna cu;

    • Myanmar
    • Nigeria
    • Eritrea
    • Kyrgyzstan
    • Sudan le
    • Tanzania an si.

    Nain, ram 4;

    • Myanmar
    • Nigeria
    • Eritrea le
    • Kyrgyzstan lawng hi ‘US pemnak (immigrant visa) le diversity visa lottery’ pek lo dingin a kham hna.

    Sudan le Tanzania rammi pawl cu immigrant visa a onh ko hna nain ‘diversity visa lottery (US pemnak visa aungbali silole green card aungbali)’ pek hna lo dingin a kham hna — Kum fatin ramdangmi 50,000 hrawng peng hi US green card visa aungbali an pek hna. A ngahtu tambik cu Africans pawl an si.

    2017 zongah President Trump nih ram 7;

    • Iran
    • Libya
    • Somalia
    • Syria
    • Yemen
    • Venezuela le
    • North Korea cu US peem lawng si loin tlawnnak nawl zong pek lo dingin a rak kham cang hna. Tutan he cun ram 13 bak a kham cang hna.
    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.