14.6 C
Hakha
Friday, October 23, 2020

US Pastor 2 cu Pumhnak Tuah Ruangah an Tlaih Hna

- Advertisement -

Louisiana le Florida states um khrihfabu 2 i pastor 2 cu pumhnak an tuah ruangah palek nih an tlaih hna.

Pumhnak tuah ruangah kan hnu zarh ah Louisiana state cozah nih a tlaih cangmi Pastor Tony Spell nih Zarhpini ah pumhnak a tuah ṭhan caah an tlaih ṭhan.

Pastor Tony Spell cu Louisiana state i Baton Rouge khua pawngah ummi ‘Life Tabernacle Church’ pastor asi.

A khrihfabu member pawl cu bus 26 in a va lak hna i biakinn ah a pumhpi hna. Minung 100 leng bak an i pum.

“Coronavirus zawtnak a karhnak hnga lo, inn chungah um uh. Minung 10 cung i pum hlah uh” tiin liamcia zarh 3 ah State Cozah hruaitu Gov. John Bel Edwards nih nawl a chuahmi a zulh lo ruangah an tlaih hi si.

Pastor Tony Spell nih, “inn ah thongtla bantukin um nak cun biakinn ah rat in i pumh an duh deuh,” tiin thawngla pawl sinah a chim.

“Inn chungah aa erhmi pawl nih an tonmi lungretheihnak le ngaihchiatnak hi coronavirus zawtnak aa ku i a thimi pawl nih an tonmi nakin a fak deuh,” ati.

Aa pummi pawl cu “zeihmanh ṭih hlah uh, ṭihnak nun ngeih tu kha nan ṭih awk si,” tiin a cawnpiak hna.

Zarhpini tiang ahkhan Louisiana state ah zawtnak ngei 13,000 leng an um, mah chungah 477 an thi cang.

Aa pum vemi pakhat nih, “Pastor Tony Spell nih thawngṭha a kan chimhmi cu ka lungtling ngai. Mah zawtnak hi ka ṭih lo. Ka thih caan a phak ahcun, ka thi ko lai,” ati.

US Khrihfabu tampi cu online lawngin pumhnak an tuah. Cheukhat cu video-meeting tuahnak app Zoom zong an hmang.

Biakinn pawngah a ummi pakhat nih, “hi tluk pulrai lak i pumhnak tuah cu ningzak an si. Thawhlawm um lai lo i tangka kan ngei lai lo ti an phan bia si [Pathian an zumh bia si lo],” ati.

Florida Pastor

pastor Rodney Howard-Browne

Florida state i Tampa Bay ah a ummi biakinn ngan taktak ‘The River’ pastor Rodney Howard-Browne zong an tlaih.

Palek nih, “minung nunnak ruat loin a member pawl cu zawtnak lakah a pumhpi hna,” tiah media sinah an chim.

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...