14.9 C
Hakha
Sunday, July 25, 2021

US le South Korea company nih chanthar internet 5G tuah hmasa an i cuh

Atu lio kan hmanmi wireless internet 4G LTE nakin let 20 a rang deuhmi 5G internet cu ram tampi ahcun a min lawng kan theih rih nain South Korea le US ram khuapi cheukhat ahcun an hman taktak cang.

Atu an buaimi cu; US companies le South Korea companies pawl nih “kanmah hi vawlei cungah 5G internet a tuah hmasa bik kan si” ti an i cuh.

April 3 ahkhan South Korea companies pawl nih an khualipi Seoul ah 5G internet hunnak (onnak) an tuah i “US le China hmanh nih an tuah khawh rih lomi kan tuah khawh cang, vawlei cungah a tuah kho hmasa bik kan si” an ti.

Mah kong cu Reuters media nih “South Korea nih 5G internet a tuah khawh hmasa bik” tiin a ttial cangka in US companies Verizon le AT&T an thin hun tuk ning hi zaagfak lei an si.

5G wireless internet cu zeidah si? Atang video ah zoh khawh si.

AT&T nih “US khuapi 12 ah 5G kan tuah cang lai tiin December 18 ah thawng kan thanh cang caah kanmah hi vawlei cungah 5G internet a tuah kho hmasa bik kan si” tiah South Korea le Media an chalh hna.

Nain, AT&T 5G internet cu 5G a ngahmi phone ah hman khawh a si rih lo. Hotspot a hmangmi computer lawngah hman khawh a si rih.

Verizon nih, “5G internet a tuah kho hmasa bik cu kanmah kan si” a ti ve.

Reuters nih South Korea 5G thawngpang a ttial cangka in Verizon nih, “5G cu kanmah nih kan tuah tuk cang si, Chicago le Minneapolis khua ahcun a chuak thar Motorola phone ah hman khawh a si lai hi nan thei lo maw” a ti colh.

Cucaah, “South Korea nih 5G internet a tuah hman khawh hmasa bik” tiin thawngpang a ttialtu Reuters media meeting an tuah colh ve.

“South Korea nih 5G internet a tuah khawh hmasa bik kan timi hi a dik bikmi si ko, kan ttialmi thawngpang a palh lo,” tiah Reuters media aiawh biachimtu nu nih a chim.

Zei ruang dah 5G tuah khawh hmasa an i cuh?

5G wireless internet cu atu lio 4G LTE nakin let 20 leng a ran deuh caah nihin technology nih a tuah khawh lomi;

  • amah tein aa mongmi cars (software le internet nih a mongh lai, minung nih mongh a hau ti lai lo)
  • Traffic jam a zor lai
  • Khuapi mei, ti, sehzung, tbk. vialte hi a langtlang (remotely) in control khawh dih a si lai
  • Doctors pawl nih a langtlang in (live video in) mizaw an thlop khawh lai (atu lio internet cu a nuarh tuk ruangah khua dang in live an thlahmi video khi minute 1 a rauh hnu lawngah kan hmuh khawh, 5G internet hman ahcun acaan te ah hmuh khawh a si lai)
  • Inn/lam saknak ttheng le seh pawl zong a langtlang in, inn chung airconditioning tangah ah rem huar in tthut buin mongh le control khawh dih an si lai
  • Virtual Reality (VR) le Augmented Reality (AR) an ttha chinchin lai i company rianttuannak caah hman khawh a si lai
  • Adang tamtuk um rih

Cucaah, 5G internet nih tangka $ trillion tamtuk a luhter lai. A tuah kho hmasa bikmi le customer a ngei bikmi cu mit tthep kar ah van-tawng in an rum lai. A tuah kho hmasa bikmi si cun customer tam deuh leem khawhnak (marketing) ca zongah a ttha.

Mah ruangah 5G internet tuah khawh hmasa bik an i cuhnak a si.

Mah pinah, 5G internet cu vawlei cung ramkip nih tuah khawh hmasa bik an i zuam cuahmah lio si caah a tuah kho hmasa bikmi ram cu a ra laimi kum tampi chung upat le ttihzah an si lai. Mah ruang ah tangka billion tampi dih le luhlinh in tuah khawh le an ram min tthat ter an i zuam cio.

South Korea cu atu lio vawlei cung ram vialte lakah internet a ran biknak ram a si.

South Korea company Samsung nih cun 5G wireless internet a ngahmi phone ‘Samsung Galaxy S10 5G’ tiang a chuah cang. — Reuters, CNBC

Malaysia COVID-19

Malaysia
996,393
Mizaw Hmuhmi
Updated on July 25, 2021 3:46 am
Malaysia
834,858
A Dammi
Updated on July 25, 2021 3:46 am
Malaysia
7,902
A Thimi
Updated on July 25, 2021 3:46 am
Malaysia
153,633
Zaw Liomi
Updated on July 25, 2021 3:46 am

Ṭial Tharmi