US le ASEAN raltuk cawnnak ah Myanmar ralkap ai tel ve

US nih Myanmar ralkap cu kehlei kut in a thongh pah in vorhlei kut in damdam a tlaih.

US cozah nih Myanmar ralkap bawizik Min Aung Hlaing le a kuttang ralbawi 3 cu ‘nan rammi harnak nan pek hna, an nuhrin covo nan buar’ tiin US tlawn a kham hna nain, rili ah raltuk a cawnpi tthiam hna.

September 2 thokin ni 5 chung US Ti Ralkap (Navy) le ASEAN ram 10 Ti Ralkap pawl cu Thailand le China kar rili ah raltuk an cawng tti hna. US hruainak avoi 1nk bik raltuk an cawn tti hna a si.

Mah raltuk cawnnak ahcun Myanmar Ti Ralkap an i tel ve. Myanmar ralkap cu Lieutenant Colonel Khun Aung Kyaw nih a hruai hna.

Myanmar Ralkap tilawng

US hi zei ruang dah Myanmar cungah hitin um? A tawifiannak in chim ahcun, China ruang asi.

US nih Myanmar ralkap tuahsernak hi a rem bak lo. Myanmar ralkap nih kum 15 chung Aung San Suu Kyi a inn ah thong an thlak lio zongah Myanmar chawlehnak vialte a phih dih.

2011 ah President Thein Sein a kai hnu ceo in duhsah tete in a phihmi a onpiak tthan. 2016 ah Aung Sang Suu Kyi party NLD nih cozah an tlaih hnu in a dihlak in a onpiak dih i Myanmar ram tthancho aa hung thok colh.

US Ti Ralkap he raltuk a cawng ttimi ASEAN ram 10

Sinain, Myanmar ralkap nih Kachin, Shan, Rakhine le Chin states, tbk., ah mipi harnak an pek peng hna caah US cozah nih ralkap bawizik Min Aung Hlaing le a kuttang ralbawi 3 cu kan hnu thla in US tlawn a kham hna.

Nain, atu hi China cozah nih ASEAN ram 10 pawngah a ummi rili “South China Sea” cu amah ta bantukin uk a timh caah US cozah a thinphang.

China ram thlanglei ah a ummi rili pi cu Malaysia, Vietnam le Japan, tbk., pawl zong nih ‘kanmah area as’ an ti vemi si.

Mah rili hi nitlak lei ram hlatnak caah hmun rem taktak, ralkap caah kuat rem taktak asi pinah rili tang chuak thil mansung tampi a um caah an i cuh cio. China nih a ningin a tlaih khawh ahcun aa rumnak lai pinah Asia ram tampi kha fawi tukin ralkap in a tthih khawh hna lai.

Cucaah, China nih a thlithup in mah rili ahcun vawlei a thlet i ralkap sakhan a sak cuahmah.

China nih mah rili a ningpi in a uk ding cu US nih a duh lo caah ‘a kaa’ in a tlerh peng. A caan ah US ralkap tilawng thlah zong in a tlerh, nain China nih zei a rel lo caah atu bantukin US cozah nih ASEAN ram 10 Ti Ralkap pawl raltuk a cawnpi hna hi si.

Myanmar cu ASEAN ah aa tel vemi ram asi pinah Myanmar hi China lei ah a ttang sual lai ti a phan caah US nih a sawm ve nak asi.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.