US Khrihfabu pawl nih ‘Trump acozah refugee lak ngol timhmi’ an lungtlin lonak an langhter

US — US khrihfabu tampi i funtomnak bu (CWS – Church World Service) nih ‘President Trump acozah nih refugee lak ngol a timhmi‘ kong an lungtlin lonak cathanh an chuah.

CWS ahhin US Chinmi a bawm zungzaltu American Baptist Churches USA zong ai tel ve.

“Trump acozah chungtel cheukhat nih hmai kum (FY2020) ah refugee pakhat hmanh lak ti lo dingin ruahnak an chuahpi, tiin Politico Pro nih a ttialmi kan hmuh cu CWS kan lau taktak,” tiah CWS nih an ttial.

“Trump nih President a ttuan hnu in ralzaam lakmi milu zat 75% a tthumh cang. Hmai kum ah pakhat tak hmanh a lak lo chap ahcun Lahwahkah (DHS) interview a aung cangmi ralzaam thong tampi harnak an ton lai pinah, vawleipi sinah US mithmai a bi lai,” an ti.

CWS President le CEO, Rev. John L. McCullough nih, “a pipu hna ram dangin a rami America rammi vialte hna thinlung ah tuni thawngpang nih launak le ngaihchiatnak a chuahter lai,” ati.

“Harnak fak bik a tongmi ralzaam pawl dornak a petu ram kan si ti lo ahcun, America nih tlang cung i a ceumi khua a sinak tampi a thlau lai.

“Ralzaam laknak progam khar cu ruah phak lo tiangin a chia i ttih a nung lai. US himnak, ramdang policy, ramchung ral le vawleipi sin i US mithmai a hnorsuan lai.

“Harnak fak bik a tongmi ralzaam, biaknak hme pawl le kan ralkap hna he ral a do ttimi Iraq rammi pawl runven dingin bia kan tiammi hna vialte kan tlolh dih lai.

“US cu ralzaam hna caah ruahchannak mei ceu siter dingin Hlutdaw (Congress) nih a rian a ttuan i Trump acozah hi a fial hrimhrim a herh.

“A ra laimi kum tampi chung ralzaam laknak program um peng dingin Hlutdaw nih acozah hi thil dik tuahter hraam seh tiah thla kan cam,” tiah CWS President le CEO, Rev. John L. McCullough nih cathluan a chuah.

Kum 1946 ah Church World Service kan dirh thok in nihin tiang ralzaam, mipeem le umnak ngei lo pawl kan bawmh peng hna, ati.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.