14.1 C
Hakha
Tuesday, September 21, 2021

US Judah biakinn ah aa pummi meithal kah an tong i minung 1 thi, 3 sizung phan

San Diego, California — US caan Zarhteni (Asia caan Zarhpini) ah meithal aa putmi pa cu Judah biakinn chungah a lut i A.R 15 meithal a lomi in aa pummi pawl a kah thluahmah hna.

Thawngttha chimpa nih bia in kan i ruah lai a ti i a kahmi hna cu chikhat aa din. Nain a kah tthan colh hna i thawngttha chimpa cu a kut ah a khen.

Aa pummi kum 60 nu cu thi lakin a kah. Thawngttha chimpa cu kuan hma a tuar. Kum 34 pa le ngakchia nute pakhat cu zenthawng a zuangmi nih a hliamh hna.

A kah hna lio hi Judah miphun caah cun Sabbath ni le Judahmi Luatnak puai a donghnak ni a si. An ni sunglawi ah tuksapur lainawnnak an tong.

Tuksapur thil a cannak Judah biakinn cu San Diego peng i Poway khuapi ah a ummi si. San Diego khuapi in meng 25 hrawng aa hlat.

Nai hrawng cu Pathian thangtthatnak hmun ah thahnawn a tam ngaingai. New Zealand muslim biakinn ah Australia Mirangpa nih muslim 50 a kah thah hna. Sri Lanka khrihfa biakinn 3 le hotel 3 ah muslim nih bomb an puah i minung 250 leng an thah hna. US ram Pittsburgh khua i Judah biakinn ah Mirangpa nih minung 11 a kah thah hna.

Poway khua palek nih “Judah biakinn meithal kahnak hi huatnak ruangah a chuakmi sualnak a si” tiah an chim. “Meithal kaptu pa cu San Diego khuami kum 19 pa John Earnest a si,” an ti.

Meithal kaptu pa cu biakinn in a zaam, a meithal a rawh caah si men lai tiah palek nih an zumh. Off day a lami US Ramri hngak pakhat nih a zaam lio ah a mawttaw a kah. Kuan nih mawttaw cu a pemh nain misualpa cu a kheng lo.

Mah lio ahhin Judah biakinn ah security an umlo. Meithal in a kah hna lio ahhin aa pummi 60 hrawng an um. Cheukhat cu mithi philhlonak ca thlacam ruah ah a rami an si nain anmah tu tuksapur thil an tong.

Thawngttha chimpa Yisroel Goldstein le aa pummi 3 hna cu an hma thlop dingin Palomar Medical Center ah an kalpi hna.

San Diego palek bawi David Nisleit nih, “meithal kaptu pa nih Rancho Bernardo i Insterstate 15 lam cung ah California Highway Lam Palek a chawnh i ka umnak hmun hi palek sinah chim hna a ti,” tiah a chim.

“Mah hnu ah kutthlir buin a mawttaw in a zuang i a va dawitu palek pa sinah aa ap,” tiah a chim.

US President Trump nih, “mi an thih cu kan ram pumpi nih kan tuar dih, hliam tuarmi pawl thla kan campiak hna. Judah mi pawl kan in dirkamh hna. Judah mi le midang huatnak nun a ngeimi lungput ttha lo paoh cu kan in mawhchiat bak hna,” tiah Trump nih a chim.

Malaysia
2,112,175
Mizaw Hmuhmi
Updated on September 21, 2021 9:40 am
Malaysia
1,880,733
A Dammi
Updated on September 21, 2021 9:40 am
Malaysia
23,744
A Thimi
Updated on September 21, 2021 9:40 am
Malaysia
207,698
Zaw Liomi
Updated on September 21, 2021 9:40 am

Ṭial Tharmi