US, Indiana ah mifir nih biakinn aircond an fir

KOKOMO, Ind. – Zahan, Zarhpini i New Hope Church ah i pumh cu a lin ngaingai. Atu cu tthal caan (summer) asi caah khua a lin khun. Mifir nih an biakinn aircond an firpiak hna caah a lin luakchuak.

“Minung pumpak sin in an fir sawhsawhmi si lo, Pathian sin in an fir,” tiah New Hope Church pastor Mike Sawyer nih a chim. Indiana state i Kokomo khua ah asi.

Aircond (A/C) cu biakinn sirlei ah an bunhmi si. Atu cu a lawng i tanmi wire hri lawng a taang.

Pastor Mike Sawyer nih, “Ningani zingka ah biakinn ka kal cu zahan zaan ah ho dek biakinn ah a ra hita ti ka theih colh. Aircond cu a ngan tuk i a rih tuk caah, mifir hi pakhat lawng asi lai lo ti a fiang,” tiah a chim.

“Ka lau lawng si lo. Tlawmpal cu ka sivang i ka tha zong chia pah.

“A pawng ah mei zong kan van. Kan biakinn cu lamkam zong asi. Mah buin an fir ngam hi cu an thi ngan taktak,” tiah a chim.

An biakinn aircond cu a thar te, kan hnu thla ah an bunhmi asi. $4,000 pi an sung ruangmang. A thar an bunh tthan hlan zarh tlawmpal chung cu an biakinn pumh a lin ngai lai.

“Zarhpini zing cu a har pah ko. Nain tluang tein pumhnak kan lim. New Hope Church member pawl cu an tthawng hrim,” tiah pastor Sawyer nih a chim.

“Kanmah nih cun ngaihthiam kan duh ko hna, nain ngaihthiam ti tikah a theipar an zun lai lo tinak asi lo,” tiah a chim

“Kan biakinn min cu New Hope (Ruahchanak Thar) asi bang, kan sang le veng ummi vialte ruahchannak pek hi kan duhmi asi. Bawmh nan herh ahcun, kan hal ulaw dih ko,” tiah a chimchap.

Mah kong cu palek sinah an report i palek nih mifir an kawl hna lio asi. — Fox59

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.