29.1 C
Hakha
Tuesday, March 31, 2020
More

    US Hlutdaw Sang nih Democrats rap chungin President Trump a luat ter cang

    Ṭial Tharmi

    - Advertisement -

    US President Donald Trump (Republican party member) cu Hlutdaw Niam i Democratic party MP pawl nih ‘upadi 2 a buar caah phuak usih’ tiin taza an cuai (impeached) nain Hlutdaw Sang i MP pawl nih ‘a buar lo’ tiin bia an khiah caah phuah asi lai lo.

    Pakhatnak ah, President Trump nih nawlngeihnak ningcang loin a hman tiin Hlutdaw Niam i Democratic MP pawl nih taza an cuaimi cu Hlutdaw Sang MP pawl nih vote an thlak i;

    • MP (Senators) 52 nih a buar lo tiin an vote
    • MP (Senators) 48 nih a buar tiin an vote.

    Pahnihnak, Hlutdaw Rianṭuannak a donh tiin taza an cuaimi cu Hlutdaw Sang i MP pawl nih vote an thlak ṭhan i;

    • MP (Senators) 53 nih a buar lo tiin an vote
    • MP (Senators) 47 nih a buar tiin an vote.

    Cucaah, President Donald Trump cu phuah asi lai lo. Hlutdaw Niam (House of Representatives or Lower House) hruaitu Nancy Pelosi le a miṭhi democratic MP pawl chunmang cu thetse cung ti khon bang a tlau dih ai.

    Donald Trump cu tu kum November 3 ah tuah ding US President Thimnak ah term 2nak aa cuh ṭhan lai. Mipi vote sawmnak campaign a tuah cuahmah lio asi. Trump campaign nih, “President Trump cu sual puhnak chungin a thiang dih cikcek cang, atu cu American mipi caah riantuan pehzulh caan asi cang,” tiin thawng a thanh.

    Hlutdaw Niam ahhin Democratic MP an tam deuh caah an duhmi paoh an tuah khawh. President Trump hi phuah dingin tazacuai usih tiin vote an thlak lio zongah Republican MP vialte nih cun ‘tazacuai lo dingin’ an vote dih ko nain tam deuh hrat cun ‘tazacuai ding’ vote nih a tei caah Hlutdaw Sang tiang an kuat khawhnak asi.

    Nain, Hlutdaw Sang ahcun Republican MP an tam deuh ve caah ‘phuah lo dingin’ an hnon khawh ve hi si.

    US phunghram ahcun, President phuah dingin ‘tazacuai (impeach)’ kong cu Hlutdaw Niam rian asi. Hlutdaw Niam nih a cuai ahcun phuah/lo kong biachahnak tuah cu Hlutdaw Sang rian asi. Hlutdaw Sang MP cheu-thum cheu-hnih nih ‘a buar’ ti lawngah president cu phuah khawh asi.

    US ram an dirhnak in nihin tiangah President 3 lawng phuah dingin tazacuai an tong rih. Donald Trump hi 3nk asi. Nain, Hlutdaw Sang nih ahohmanh a phuak taktak bal hna lo. Adang 2 cu;

    • President Andrew Johnson – February 24, 1868 le
    • President Bill Clinton – December 19, 1998 an si. Andrew Johnson cu term 2nk aa rak cuh ti lo. Bill Clinton cu term 2nk a tuan lio ah si. Term 2 (kum 8) tiang lawng US president tuan khawh si. Trump lawng hi phuah dingin tazacuai hnu ah term 2nk aa cuh ngammi si.

    Charhchan: The New York Times, Fox News le CNN

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.