18 C
Hakha
Tuesday, September 21, 2021

US Hlutdaw Niam (House) nih President Trump bia cu miphun thleidan si, ati cang

Washington — US Hlutdaw Niam (House of Representatives) ah “President Donald Trump nih Democrat MP nu 4 a timi hna bia kha miphun thleidan asi maw?” tiah vote an thlak.

MP/representative 240 nih ‘miphun thleidan asi ko’ tiin an vote i MP 187 nih ‘asi lo’ tiin an vote. Cucaah “President Trump nih MP nu 4 a timi hna bia cu miphun thleidan asi” tiah US Hlutdaw Niam nih a fehter.

Liamcia kum 100 chungah tutan hi avoi 1nk bik US Hlutdaw Niam nih US President a doh si.

Republican party MP 4 zong nih “miphun thleidan asi” tiin an vote ve. Democrat MP paoh nih cun ‘miphun thleidan asi’ an ti dih.

“President Trump bia cu miphun thleidan asi” tiin a vote tu Republican party MP 4 hna cu;

  • Rep. Will Hurd (Texas)
  • Rep. Susan Brooks (Indiana)
  • Rep. Brian Fitzpatrick (Pennsylvania) le
  • Rep. Fred Upton (Michigan) hna an si.

US tuanbia ah “President Donald Trump nih Democratic party MP/representative nu 4 cu Mirang an si lo ruangah a thleidan hna…” tiin a caam peng cang lai. US Hlutdaw Niam cazin ah a hmun cang lai.

President Trump nih, “Twitter ah Democrat nu MP 4 ka timi hna cu miphun thleidan asi lo. Ka pum chungah miphun thleidannak ruh ka ngei lo! Hlutdaw Niam ah mah kong vote thlak an timhmi hi Democrat mithmai kawlnak ngian asi. Republican pawl nih an zaang dernak an langhter lo le Democrat rap ah an tlak lo hau,” ati.

“Kan ram hi an dawt awk asi. Kan ram hi an huat awk si lo,” tiah President Trump nih a peh.

President Trump nih cun zeitin dah a rak ti hna?

Zarhpini ahkhan President Trump nih Twitter ah “Democrat nu MP pawl nih cutin khatin US cozah nih rian a ttuan awk si tiah US mipi an chimh lenmi hna hi cu a mak ko.

“A rawk dih cikcekmi le sualnak in a khatmi an ratnak ram ahkhan va kir hna sehlaw remh va bawm deuh hna seh,” tiah a ttial.

Mah cu ‘miphun thleidan asi’ tiah i faksak takin Democrat pawl nih an i kuaih i Trump cu “miphun thleidan hmang, president dingah nai tlak lo..” tiah a phunphun in an ti. MP nu 4 zong nih lehnak an tuah colh.

Hnu ah President Trump nih, “mah ka ttialmi kha miphun thleidan asi lo, US cozah nih rian a ttuan ning an soi peng i an zai peng ruangah mah tlukin US nan huat le nan i nuamh lo ahcun nan chuak kho ko, ka timi hna si,” tiah a chim.

Mah hnu ah Hlutdaw Niam hruaitu nu Democrat MP Nancy Pelosi nih vote a thlakpi hna i ‘miphun thleidan asi’ tiin an fehter hi si.

Hlutdaw Niam ahhin Republican nakin Democrat MP an tam deuh.

Malaysia
2,112,175
Mizaw Hmuhmi
Updated on September 21, 2021 10:41 am
Malaysia
1,880,733
A Dammi
Updated on September 21, 2021 10:41 am
Malaysia
23,744
A Thimi
Updated on September 21, 2021 10:41 am
Malaysia
207,698
Zaw Liomi
Updated on September 21, 2021 10:41 am

Ṭial Tharmi