US cozah nih Standard Chartered bank $1.1 billion dan a tat

US cozah nih Standard Chartered bank $1.1 billion dan a tat

US cozah nih chawlehnak a phihpiakmi ram; Iran, Myanmar, Sudan le Lybia mirum pawl nih US ah an ngeihmi tangka cu Standard Chartered bank nih a thli tein a rak kuat piak hna.

Mah cu hnu ah US cozah nih a hngalh caah New York biaceihzung ah taza a cuai i $1.1 billion dengmang dan a tatnak hi si. Standard Chartered bank zong nih liam dingin minsen a thut cang.

UK khualipi London ah hrambunhmi Standard Chartered bank nih $1.1 billion dengmang a liam dingmi chungah $928 million cu US cozah sinah a liam lai i a tangmi $133 million cu Britain cozah sinah a liam lai.

Dubai, UAE ah a rak ummi Standard Chartered bank lutlai hlun nih “Iran, Lybia, Myanmar le Sudan mirum pawl tangka kan rak kuat piak tak ko hna” tiin US biaceihzung ah aa phuan hnu ah $1.1 billion liam dingin dan an tat hi si.

US biaceihzung nih “US nih a khammi ralkap thilri a cawtu UAE pa nih suitcase in UAE tangka 3 million (pound 500,000) aa put i Standard Chartered bank ah a va kal, Standard Chartered bank nih a konglam hlat hmasa loin a kuat piak,” tiah a chim.

“Cun, 2008 in 2014 kar ahkhan phungninglo tangka $600 million cu London le Dubai ah a ummi Standard Chartered bank office in an rak kuat piak hoi hna

“Mah pinah; Syria, Myanmar le Cuba mirum pawl phungninglo tangka $20 million zong Standard Chartered bank nih a rak kuat piak hna.

“Iran ram ah a ummi pawl nih Standard Chartered bank in US dollar account an i tuahmi zong Standard Chartered bank nih pakhat hmanh a kham hna lo. Standard Chartered bank website in duhtawk in US le Iran kar ah tangka an kuat peng,” tiah New York biaceihzung nih taza a cuai.

“Iran ram in Dubai ah fax in tangka an kuatmi pawl zong Standard Chartered bank nih pakhat hmanh a kham lo pinah, US cozah nih theih khawh lo dingin hitin nan company min thleng uh ti tiangin ruahnak a cheuh hna i account a hun piak hna,” a ti.

Acung lei ruang tthiamtthiam ahhin, 2014 ah US cozah nih Standard Chartered bank cu $300 million a rak liamter cang.

Mah ruang tthiam ah, 2012 ah US cozah nih $667 million a rak liamter hoi cang.

Tutan ah tehte thar an hmuh tthan caah taza an cuai tthan i $1.1 billion an liamter tthan hi si. — Reuters

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.