29.1 C
Hakha
Tuesday, March 31, 2020
More

    US Chinmi caah thawngchia: Trump acozah nih minung 3.1 million cu ‘food stamp’ phih a timh hna

    Ṭial Tharmi

    - Advertisement -

    Washintong — President Trump acozah nih thazing ah ‘minung 3.1 million food stamp phihnak policy’ a chuahpi lai, tiah US Cinthlaknak Zung (USDA) rianttuan nih an chim.

    US um Chinmi nih cun kan theih dih bang, ‘food stamp (SNAP)’ cu US cozah nih mi harsa pawl market ah rawl chuan ding cawknak a bawmhmi hna (cozah nih EBT card ah tangka rawnpiakmi) asi.

    US a phanka Chinmi paoh cu US cozah nih free in rawl cawknak ‘food stamp (SNAP)’ le ‘a harsami chungkhar caankarlak bawmhnak (TANF) tangka’ pek dih kan si.

    US a phaknak kum 5 leng asi cangmi le US ah a chuakmi zong a hmuhmi tangka (income) aa za lomi pawl cu rawl cawknak ‘food stamp (SNAP)’ an bawmh hna.

    Chinmi cheukhat cu kan herh lo buin food stamp kan sok i midang sinah tangka/cash in kan zuar. Kha bantuk kha Trump acozah nih phih viar a duh. Mah policy an fehter ahcun ‘a harsa taktakmi, income aa za lo taktakmi lawng’ nih an ngah cang lai.

    Tu hnu cu, tangka bawmhnak (TANF) a sokmi paoh cu an income le an chawva zoh dih hmasa hnu ah SNAP/food stamp pek awk an tlak le tlak lo bia khiah si cang seh, ti hi Trump acozah nih a duh.

    Thaizing ah mah policy cu an chuahpi lai i an fehter ahcun atu lio i food stamp a eimi chungah minung 3.1 million cu pek an si ti lai lo, i US cozah nih kum fatin tangka $2.5 billion peng aa chiah khawh lai.

    U.S. President Donald Trump nih, “atu cu kan ram chawlehnak a ttha tuk cang i rian a ngei lomi zong an zor tuk cang caah, rawl cawknak ‘SNAP (hlan ah food stamp tiin auhmi)’ kan bawmh pengmi hna hi mi tampi nih an herh ti lo,” tiah a chim.

    “SNAP (Food Stamp) hi kan phih ahcun American pawl nih tax an pekmi tangka $15 billion hrawng kan khon khawh lai,” ati.

    “State tampi ahcun ningcang loin food stamp (SNAP) an sok. A ngaite ahcun a ngah ding an si lo nain ngahnak nilaan te an i theih i cutin an sok peng,” tiah USDA Secretary Sonny Perdue nih a chim.

    Atu lio hi, food stamp (SNAP) a eimi minung 40 million hrawng an si. US milu dihlak 330 million si kaw zatuak 12% hrawng bak hi cozah nih thla fatin rawl cawknak a bawmh peng hna tinak asi. — Reuters, CNBC

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.