US Chin pa a ruak in tiva chungah an char

US Chin pa a ruak in tiva chungah an char

US ram, Oklahoma state i Tulsa khuapi ah a ummi Peter Lang Khan Zam cu May 20 zingka 10am ah a ruak in tiva chungah an char.

Tulsa khuapi Meithat Zung nih, “May 20 zingka 10am ah Arkansas tiva chungah a ruak in kan char,” tiah an chim.

May 10 ahkhan ti i lio dingin Arkansas tiva ah a kal. Ti chungah a zuang i a chuak kho ti lo. A tlau.

A hawile nih 911 an chawnh i Tulsa Meithat Zung nih tiva chungah zarh 1 chung an kawl nain an hmu kho lo.

Tiva ti a kai chin lengmang caah kawl cu an ngol chung, i atu bantukin May 20 zingka ah an hmuh hi si.

Tulsa Meithat Zung biachimtu Andy Little nih, “a ruak kan hmuhnak zawn hi 81th Street le Riverside Parkway pawng i Arkansas tiva chungah a si,” tiah a chim.

“Tiva ahhin nan hmuh khawh lomi ttihnung tam tuk a um. Tiva ti zong a kai chin lengmang caah tiva ah ttum hin hlah uh,” tiah Tulsa khuami pawl ralrin a pek hna.

A ruak a rawh tuk cang caah an hmuhka ahcun aho si an hngal lo. Ruak checktu cozah zung State of Oklahoma Medical Examiner an chawnh.

Anmah nih mawttaw in a ruak cu an kalpi i an check hnu lawngah Peter Lang Khan Zam a si ti an hngalh.

Theihternak: Nangmah nawl in kan ca copy hlah. Facebook share lawng kan onh.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.