14.1 C
Hakha
Tuesday, September 21, 2021

US ah Covid-19 in minung 4,000 leng an thi cang, 9/11 ah thimi nakin an tam deuh

Covid-19 zawtnak in US rampumpi ah minung 4,000 leng an thi cang, tiah Johns Hopkins University nih a langhter. Tuni, April 1 tiangah 4,076 an thi cang.

New York state ah a thimi an tambik. 4,000 leng chungah a cheu dengmang hi New York state ah a thimi an si.

Zawtnak aa thoknak China ram nakin US ah a thimi an tam deuh cang.

‘9/11’ tiin auhmi 2001 September 11 ah ralhrang nih New York City um World Trade Center (Twin Towers) vanlawng in cim dihlak in an pah lio hmanh ah minung 3,000 dengmang lawng an thi. Covid-19 in a thimi an tam deuh cang, tiah Wall Street Journal nih a ṭial.

US rampumpi ah covid-19 in a zawmi dihlak 189,510 an si cang. A zawmi an tambiknak ram asi.

Hmasa ah US President Donald Trump nih zei a rel huaha lo nain a thimi le zawmi an tamtuk i khuaci mui dirhmun an phak cang caah “a ra laimi zarh 2 chung cu a fak taktak lai…” tiah tuni ah a chim ve cang.

US President inn (White House) sibawi thiamsang Dr. Deborah Birx le a rianṭuan hawi hna nih, “tu kum chungah covid-19 zawtnak in US ram ah minung 200,000 tiang an thi kho men,” tiah an chim.

US state 50 lakah 30 leng nih ‘hohmanh lengchuak loin inn chungah um dih uh….’ tiin nawl an chuah cang. Cucaah state 30 leng i minung 250 millions leng cu rian an ṭuan kho ti lo i an harsa ngai lai.

President Trump nih, “US rampumpi (state dihlak) ah hohmanh lengchuak loin inn chungah um uh tiin nawl chuah/lo kong cu kan i ceih nain nawl chuah dawh kan si rih lo,” tiah a chim.

New York City ahcun sizung an i zat ti lo caah convention center le panchian (park) ah lawlawse sizung an on cuahmah. Lawlawse ruak chiahnak caah ‘tikhalkuang mawtaw (refrigeration trucks)’ tampi an hman hna.

US Ti Ralkap Sizung Lawng (Navy Hospital Ship) tiang an hman. US Ti Ralkap Sizung Lawng cu nizaan ah New York City a hung phan – atang video ah a phak lio zoh khawh si.

US ah Chinmi tambik kan umnak Indiana state zongah minung 49 an thi i 2,100 an zaw cang. Texas state zongah minung 41 an thi i 3,266 an zaw cang.

US rampumpi (state 50) ah zawtnak ngei an um dih cang. US um Chinmi paoh dawr kal le lenvah i sum cio usih. Asi khawh ahcun inn chung te ah um cio usih.

Malaysia
2,112,175
Mizaw Hmuhmi
Updated on September 21, 2021 6:34 am
Malaysia
1,880,733
A Dammi
Updated on September 21, 2021 6:34 am
Malaysia
23,744
A Thimi
Updated on September 21, 2021 6:34 am
Malaysia
207,698
Zaw Liomi
Updated on September 21, 2021 6:34 am

Ṭial Tharmi