14.1 C
Hakha
Tuesday, September 21, 2021

US ah covid-19 in minung 5,000 leng an thi cang, minung 250,000 tiang an thi kho

US rampumpi ah coronavirus (covid-19) zawtnak in minung 5,137 an thi cang. Nizaan tiang ahcun minung 4,000 fai an thi nain ni 1 chungah minung 1,000 leng an thi chap. Zawtnak ngei minung 216,722 an si cang.

US cu covid-19 zawtnak ngei an tambiknak ram a hung si. Zawtnak aa thoknak China ram hmanh ah minung 82,431 lawng an zaw i 3,322 lawng an thi.

Chinmi tambik kan umnak Indiana state zongah zawtnak ngei minung 2,568 an si cang i 65 an thi cang. Texas state zongah zawtnak ngei minung 4,607 an si i 68 an thi cang.

New York state ah a thimi an tambik. Mizaw 84,000 leng an si cang i 2,200 leng an thi cang. New York City lebang ahcun sizung an i phanzo ti lo, i US Ralkap nih Convention Center le Park pawl cu lawlawse sizung ah an ser/thlen hna. Miruak chiahnak caah tikhalkuang mawtaw (refrigerated trucks) pawl an hman hna. US Ralkap Sizung Lawng (Navy Hospital Ship) tiang an hman.

President Inn (White House) sibawi thiamsang pawl nih “tu kum chungah covid-19 nih US ah minung 250,000 tiang a thah khawh men hna” tiah an chim.

US Ralkap 3,000 Nih Raltuknak Tilawng Chuahtak

‘USS Theodore Roosevelt’ tiin auhmi raltuknak tilawng ah coronavirus zawtnak a um caah ralkap 3,000 dengmang an chuah hna lai. Tilawng chung ahcun mizaw tampi adang tein chiah awk an ṭhat lo caah tilawng in chuah dih lawlaw a hau, tiah Navy bawi pawl nih thawng an thanh.

Atutiang ah ralkap 1,000 an chuah cang hna. Ralkap 5,000 dengmang an umnak tilawng asi. Zawtnak ngeih/lo an test thluahmah hna i atutiang ah ralkap 100 dengmang zawtnak an ngei cang. Tilawng cu atu hi Guam ah a dir i ralkap pawl cu an ṭhial thluahmah hna lio asi.

Ralkap 1,000 tal cu tilawng zohkhenh dingin taan a hau. Tilawng thiang tein chiah a hauh caah 3,000 dengmang chuah kan timh hna hi si, mah nak tam zong chuah an si te kho. Ni tlawmpal hnu ahcun ralkap chiahnak ah hotel khaan tiang hman kan hau te lai, tiah Navy bawi pawl nih an chim.

US Cozah A Daithlang Tuk

Zawtnak aa thokka ah President Donald Trump le state cozah pawl nih an daihthlanh tuk caah khuaci mui dirhmun an phak hi si.

Asia ram pawl (China, Malaysia, Singapore, tbk.,) bantukin, an ram ah zawtnak aa thok cangka in lockdown (khualtlawng phih, lengchuah le chawhvah, mibu in puai tuah le i pumh, tbk., phihnak) an tuah colh lo ruangah zawtnak ngeimi tlawmpal nih minung tamtuk an chawnh manh hna, atu cun sizung hmanh an i phanzo ti lo. Khuaci mui dirhmun an phan cang.

Atutiang ah US state 39 nih mipi lengchuah an phih cang nain, state 11 nih cun an state ah zawtnak ngei an um ve ko nain atutiang lengchuah an phit bal hlei lo. US ram state dihlak ah zawtnak ngei an um dih cang.

State 11 cu California state cozah hruaitu Gov. Gavin Newsom nih, “zei dah nan hngah rih? Lengchuah phihnak caah tehte zeizat remruam dah nan herh rih? Kan tong lai lo tiin nan ruah cun, US rampumpi le vawlei pumpi ah tehte a um ko hih…,” tiin lengchuah phih a fial hna.

California hi US state 50 lakah lengchuah a phit hmasa bikmi state asi. US ram ah minung an tambiknak state zong asi i 40 million an um, Canada le Norway ram 2 fonh milu zat an si.

US Rammi 10 Millions Nih Rianngeilo Bawmhnak Sok

Zawtnak ruangah company tam taktak an khar hna caah le company tampi an sipuazi a tlak tuk caah an rianṭuantu tlawmpal an phuah (layoff) bang hna i minung millions tampi rian an ngei lo i harnak an tong.

Liamcia zarh 2 chungah minung 10 millions nih cozah sinah ‘rianngeilo (unemployment) bawmhnak’ an sok.

Kan hnu zarh lawngah a sokmi hi minung 6.6 million leng an si. US khuasa Chinmi zong (citizen he green card he), zawtnak ruangah rian phuah a tongmi paoh cu cozah sinah ‘unemployment bawmhnak’ sok khawh asi.

Trump Acozah bawmhnak

President Donald Trump nih, US mipi minung 1 $1,200 cio bawmhnak caah le company pawl bawmhnak caah $2 trillion hman dingin ‘CARES Act’ timi upadi ah kan hnu zarh khan minsen a thut cang.

Tu hnu zarh 3 chungah IRS nih tax a pemi paoh cu (citizen he green card he) nan bank account ah $1,200 cio an kuat thluahmah cang hna lai. Kum 1 ah $75,000 tang lahkhah a eimi lawng nih $1,200 ning tein nan ngah lai. Kum 18 tang nan fale zong $500 cio bawmh an si lai.

Tahchunnak ah; nangmah le na nupi rian nan rak ṭuan veve i tax nan pe veve. Kum 1 chung nan lahkhah $75,000 tang veve (fonh $150,000 tang) asi ahcun IRS nih nan bank account ah $2,400 an kuat hna lai. Kum 18 tang fa 2 nan ngeih ahcun $3,400 an kuat hna lai.

Kum 1 ah lahkhah $75,000 cung a eimi zong bawmhnak nan ngah ve ko lai, nain tlawm deuh lawng nan ngah lai.

Mah hi cu nangmah nih sok a haumi si lo. Cozah nih tax petu paoh bawmh dingin bia a khiahmi si. ‘Riangngeilo (unemployment) bawmhnak’ asi lo. Rian phuah tongmi zong, rian tuan liomi zong ahopaoh bawmh dih nan si lai.

Thla fatin asi lai lo. Voi 1 lawng asi lai. Phungninglo in US ah rianṭuanmi ramdangmi pawl cu nan ngah lai lo. Mah kong hi cu hnu ah amah dang in tling tein ka ṭial te lai.

Charhchan: The Washington Post, New York Times, Johns Hopkins University, CNN

US khuasa Chinmi vialte ralring tein um cio usih. A herh tuk lo ahcun dawr kal le lenvah lo a ṭha. A herh tuk sile mask i hruk law midang he pe 6 hlat in dir/kal. Minung tampi nih an tonghmi dawr le lift kutka, tbk., tongh lo i zuam, chapiat le sanitiser in na kut thiang tein ṭawl peng. Zawtnak rungrul dotu na thi a ṭhawnnak hnga zaan tuante ah it law ti thiang tampi in ding, anhringso tampi in ei.

Malaysia
2,112,175
Mizaw Hmuhmi
Updated on September 21, 2021 6:34 am
Malaysia
1,880,733
A Dammi
Updated on September 21, 2021 6:34 am
Malaysia
23,744
A Thimi
Updated on September 21, 2021 6:34 am
Malaysia
207,698
Zaw Liomi
Updated on September 21, 2021 6:34 am

Ṭial Tharmi