15.3 C
Hakha
Thursday, October 22, 2020

US ah Covid-19 in minung 13,000 leng an thi cang

- Advertisement -

US ram ah coronavirus (covid-19) in minung 400,000 leng an zaw cang, mah chungah 13,800 leng an thi manh. Ni 1 chung te lawngah minung 1,800 leng an thi. A zawmi hi Chin state milu zat deng an si cang.

New York state lawngah minung 149,400 leng an zaw cang, mah chungah 6,000 leng an thi. Italy ram ah a zawmi nakin New York state lawngah a zawmi an tam deuh.

New Jersey state ah minung 47,400 leng an zaw ve cang, mah chungah 1,504 an thi cang. A changtu, Michigan state ah minung 18,700 leng an zaw i mah chungah 845 an thi cang.

Chinmi 20,000 leng kan umnak Indiana state ah minung 5,943 an zaw cang, mah chungah 203 an thi cang. Nihnihni in atu kar ah zawtnak ngei minung 436 bak an karh.

Chinmi tambik kan umnak Marion County te lawngah zawtnak ngei 2,290 an um cang. Nihnihni in atu kar ah zawtnak ngei minung 149 an karh manh.

Indiana state county 92 lakah 89 ah zawtnak ngei an um dih cang. Mah hmanh cu minung 30,000 lawng an test rih hna. Zawtnak a ngei nain hmuh rih lomi tam tuk lengluang an um rih kho.

Texas state zongah zawtnak ngei minung 9,353 an um i mah chungah 177 an thi cang. Harris County lawngah minung 2,146 an zaw i Dallas County ah 1,261 an zaw cang.

Chinmi tlawmpal kan umnak Iowa state ah zawtnak ngei 1,145 an si cang, mah chungah 26 cu an thi cang, tiah state cozah hruaitu Gov. Reynolds nih tuni ah a thanh.

US cu vawlei cungah Covid-19 zawtnak ngei an tambiknak ram asi pinah a thimi tambik 3nak zong asi.

Italy ram ah a thimi an tambik i minung 17,600 leng an thi cang. Zawtnak ngei hmuhmi dihlak (a dammi le thimi rel chih) 139,400 leng an si cang.

A changtu ah Spain ram asi i minung 14,673 an thi cang. Zawtnak ngei hmuhmi dihlak 146,900 leng an si cang.

Inn ah um uh

Zawtnak karh nuar deuh seh tiin US state dihlak dengmang nih “inn ah um uh” tiin order an chuah cang.

State khat le khat nih “inn ah um uh” tiin order an chuah ning aa dang cio nain a tlangpi in a tanglei langhtermi;

  • Rawl le sii cawk
  • Sibawi sin i piah le
  • Lengah exercise tuah ruah lawngah lengah chuak uh, an ti.

Hi bantuk a herhmi cawk le tuah dingin leng nan chuah tik zongah;

  • hmaihuh/mask i hruk uh
  • mi he aa naih tukin um hlah, pe 5 hlat tal in um uh
  • minung 10 leng i bu hlah uh
  • na kut in na zeihmanh i tong thlah
  • na kut chapiat in thiang tein ṭawl peng, an ti.

Covid-19 damhnak sii

Atutiang ah damhnak sii an ser kho rih lo, khamnak sii zong an ser kho rih lo. Ramkip scientists nih ser an i zuam cio nain, a tlawmbik kum 1 paoh cu a rau lai, tiah Vawlei Ngandamnak Bu (WHO) nih a thanh.

Cucaah, acunglei bangin nai ven pinah mah zawtnak rungrul nih na pum a tei khawh lonak dingin na um a herh;

  • Mitkuh vuai tein it
  • Ti tampi ding
  • Anhringso tampi ei
  • A tlormi/thaumi le junk food ei i sum
  • Kuak zuu hlah
  • Saupi in na thaw dawp (na cuap thahri ṭhawnter) lengmang

Nizaan tiangah coronavirus nih vawlei pumpi ah minung 1.4 million leng a zawt ter cang hna i 81,000 leng a thah cang hna – mah hi hmet law ramkip cazin tling tein zoh khawh asi.

Charhchan: US CDC, WHO, Johns Hopkins University, Washington Post, New York Times, Health Departments of Texas, New York, Iowa

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...