17.1 C
Hakha
Tuesday, August 11, 2020

UNHCR nih Malaysia Chin ralzaam sianginn vialte a kharter dih hna

- Advertisement -

Kuala Lumpur — Malaysia ah coronavirus zawtnak a karh chin lengmang caah UNHCR nih Malaysia ralzaam sianginn vialte cu ‘nan sianginn khar uh’ tiin tuni ah email a kuat hna.

“On dingin thawng kan in thanh hna hlan lo khar chung uh,” ati hna. Chin refugee sianginn lawng si loin Rohingya, tbk., refugee sianginn vialte a kharter dih hna.

Siangngakchia nulepa nih thil sining an in hal hna ahcun, sianginn khar dingin email kan in kuatmi hna hi piah hna uh, ati.

“Malaysia ah coronavirus zawtnak a karh chin lengmang ruangah, a karhmi zorter dingin UNHCR nih rianrang tein ralrinnak kan tuahmi asi.

“Malaysia Ngandamnak Vuanci Zung le Kuala Lumpur State Ngandamnak Zung nih ‘minung tampi i pum hlah uh’ a timi zul in kan tuahmi asi,” tiah UNCHR nih ati.

“Ralzaam pawl cu an taklinh, khuh khuh le thaw chuah an i harh ahcun cozah sizung silole clinic ah i piah hna seh. Coronavirus zawtnak letkhana a ngeimi paoh cu free in check le thlop an si.

“Coronavirus zawtnak letkhana na ngeih lo zongah i test na duh ahcun RM40 liam asi.

“UN card le catlap tat-ṭan-ṭu (renew) zong a ngah rih lo. UNHCR zung on ṭhan tik lawngah ngahte lai. Tlaih nan tonnak hnga lo le zawtnak nan i ku nak hnga lo lengchuah i sum uh” ati.

Coronavirus zawtnak cu i chawnh fawi tuk caah rang tukin a karh. Malaysia muslim biakinn ah aa pummi minung 77 leng zong coronavirus zawtnak an i chawn.

Malaysia Prime Minister Pu Muhyiddin Yassin nih “coronavirus zawtnak a karh chinnak hnga lo biaknak puai le pumh vialte, zatlang puai le meeting vialte, zaanglek/sports puai vialte April 30 tiang kan khap,” tiin a thanh. Mah kong cu kahin Malaysia media New Strait Times nih a tialmi rel khawh si.

Cucaah, Malaysia ramchung biaknak kip nih an pumh, puai le meeting vialte an ngol hna, nain Malaysia Chin khrihfabu pawl cu mah ca kan tial lio tiangah pumh a ngol chungmi an um rih lo.

Chin Refugee Sianginn cheukhat an khar colh cang

Siangngakchia 130 hrawng a ngeimi Chin Student Organization (CSO) Chairman Saya Tawk Lian Sang nih, “tuni chun hnu in sianginn cu kan khar cang. On ṭhannak kong cu UNHCR thawngthanh kan hngak ko,” tiah The Chin Express ah a chim.

Siangngakchia 265 a ngeimi Alliance of Chin Refugee (ACR) Chairman James Bawi Thang Bik nih, “tu zarh chung cu kan sianginn ningin kan khar lai. A ningin khar peng cu nulepa rianṭuannak caah a har tuk lai caah hmai zarh lei cun a phuphu in kan khar te lai,” tiah a chim.

“Ngakchia 114 a ngeimi Zophei zong nih an mucu he sianginn he tu zarh chung an khar cang. Hmai zarh lei cu thil sining kan zohchom te lai an ti,” tiah Zophei Sianginn ah cachimmi Sayama Ngun Hlei Iang nih a chim.

Atang hmanthlak hi UNHCR nih ca a kuatmi hna si.

Na Rel Cang Maw?

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...