UNHCR nih Chin ralzaam card a pek tthan hna lai

UNHCR nih Chin ralzaam card a pek tthan hna lai

UNHCR nih Chin ralzaam hlawtnak policy a leet cang ti cu ho paoh nih theih dih asi.

“Cun, ralzaam card chuh cangmi pawl zong kha kan pek tthan hna lai,” tiah East Asia UNHCR tlaitu UNHCR Thailand nih tuni ah Malaysia media The Star sinah ca a kuat.

2018 August thla in hlawtnak policy kan thok hnu ah, “a ralzaam sinak ruahpiak lio asi (Under Consideration)” timi catlap pekmi paoh kha UNHCR card pek tthan dih an si lai, tiah Thailand um UNHCR zung biachimtu nih a chim.

Thailand khualipi Bangkok ah a ummi UNHCR zung hi East Asia (Malaysia, India, Nepal, tbk.,) UNHCR zung vialte a uktu si.

UNHCR card peknak kong cu fiang deuh in Malaysia le India um UNHCR zung nih Chin ralzaam upa sinah an chimhte hna lai, ati.

Malaysia ahcun UNHCR card a ngeimi cu palek le lawahkah tlaih an luat. An damlo tik zongah cozah sizung ah acheu (50%) dawt an si.

Hmailei a rauh hlan ah Chin ralzaam hlawtnak policy nan tuah tthan lai maw? tiah UNHCR cu bia an hal.

“UN Upadi 1951 Articel 1C ah aa ttial bantukin an ram ah thlennak pical a um hnu lawngah mah kong cu kan ruahtthan te lai,” tiah UNHCR biachimtu nih a leh.

“Myanmar ram ah a hmunmi thlennak pical a um hlan chung paoh cu Chin ralzaam hna hi an ralzaam sinak pehzulh piak peng an si ko lai,” a ti.

UN catlap zong a ngei ti lomi (hlawt/reject thai cangmi) pawl tah card a kan pe ve lai maw?

Mah kong hi The Star media nih fiang tein a langhter lo. UNHCR biachimtu nih a chim bang, a rauh hlan ah UNHCR Malaysia le Delhi nih Chin ralzaam upa pawl sinah fiang le tling tein an chimhte hna lai.

Lungsau tein thawngpang hngak rih ko hna usih.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.