UNHCR card aa tlaihmi Indonesia nu an tlaih

Malaysia Lahwahkah nih UNHCR card aa tlaihmi Indonesia nu le a fate cu zahan zaan deilei 2am ah an tlaih hna.

Perlis state Lahwahkah bawi Othaman nih, “kum 20 nu le a fate (kum 1) cu ningcang loin UNHCR card an ngah ruangah zahan zaan deilei 2am ah kan tlaih hna,” tiah a chim.

“Mah pinah, July 31 in zahan tiang tlaihkhihnak kan tuah i phungninglo ramdangmi 18 kan tlaih hna.

“Minu nih ‘keimah le ka fate cu Myanmar ram in a rami refugee kan si’ a ti nain, Myanmar holh zong kaa khat hmanh a thiam lo. UNHCR card aa tlaih vemi Myanmar pa he an rak um tti.

“UNHCR officer pawl a hlen hna i card a ngahmi si lai tiah kan zumh. Nain, Myanmar holh a thiam lo.

“UNHCR card ngah a bawmtu an si ttheo lai tiah zumhmi a boss kum 30 le 40 kar Malaysia rammi pa 4 zong kan tlaih hna.

“Tlaihkhihnak kan tuah lio ahhin, inn saknak hmun 21 kan luhhnawh i phungninglo ramdangmi pa 17 le nu 1 kan tlaih hna.

“Kum 20 in 45 kar Bangaldesh le Indonesia rammi an si. Palek nih kan hmu hna hlah seh tiin inn saknak hmun chung le khuate deuh ah an um hna. Palek an hmuh hna paoh ah thing tang ah an zaam tawn.

“Kan tlaihmi hna cu an dihlak in lahwahkah thong (camp) ah kan hren hna i Kum 1959/63 Lahwahkah Upadi Dal 51 (5) (b) in case tuahpiak an si,” tiah lahwahkah bawi nih a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2017 ah The Chin Express a dirh i ni fatin Chin thawngpang le vawlei cung thawngpang phunkip a ṭial.