Umhar Phen Saduhthah: “Lai Online Media” maw ka tuah lai “Evangelist Sumdawng” dah ka ttuan lai

Umhar Phen Saduhthah

Umhar Phen Saduhthah

Rian dinh ni a si, umhar phen ah saduh ka that. Umhar phen saduhthah hi phaisa fangkhat hmanh a dih lomi ah cun a nuam ngai hme hi ka ti, nain tuchun saduh ka thahmi ah lungtlinnak pakhat hmanh ka ngei kho tthan lo. Tuchun saduh ka thahmi hna cu:

1. Online Media Ttialtu

Ka pumrua nih hawi tia lo, ka thazaang nih hawi tluk lo ka si tikah pawcawmnak caah rianhrang ttuan hi a fawi lo. Inn-dai tangah tthut hmun in phaisa kawlnak online media tal hin phaisa kawl ve ning tiah saduh ka that tthan.

Ka thiamnak zoh tikah ‘A for Apple’ tibantuk lawng a thiammi ka si pinah Laica koko hmanh ttha tein ka ttial thiam lo caah zeibantuk thawngpang hmanh a ttial kho ding ka si lo.

Nain, kan Lai media ttialtu tampi zong cu zei huahapi an ttial cio ttung lo; “Bil Sung maw na uar deuh, Hlawn Sung”, “ Lu Lu Aung le Thin Za Wint Kyaw sexy takin phozarnak hmanthlak”, “Kan Lai hlasak thiam sexy deuh in an i hruknak”, “Midang nih an Timeline ah ca an ttialmi rak post piak”, “Pakhat le pakhat fak deuh in an i comment nak zawn char riangmang i post piak” asiloah “midang nih ttial ciami thawngpang mah nawl in copy tuah i post” tibantuk luala pei an hman cio ve ko cu, ti ka ruat.

Nain, online ah pakhat le pakhat siknak a zualtertu, thawngpang fiang lomi ttial hman ruangah zapi lung a buaitertu, thiamnak zeihmanh ngei lem loin online media i catialtu si ve ruangah online medie belnang nalhtu ka si ve sual lai ti ka ruat tthan. Caah, atu ka saduhthahmi ah ka lungtling kho lo.

2. Online Minthang

Minthan a duh lomi kan um theng lai lo. Nain, minthangmi si hi a rak fawi lo. Nain, atu lioah cun kan Laimi chungin online ah cikkhat te tal cu minthangmi an um pah lengmang cang. Ka minthan lo tukah ka chungkhat le ka innpa hmanh nih a ka thei lomi an tam.

Chanchung ca si khawh lo hmanh ah nihnih-khat tal minthan duh ve ahcun online ah zeibang zeibang van phomh ve ahcun minthan colh a si ko. Cucaah, “Hello, nan dam hna maw? Ka na ngai hna.” van ti ve zong hi lungah a chuak.

Cun, online ah minung pakhat, bu pakhat tibantuk, asiloah atu lioah a linsa ngaimi CNF/A huatnak maw ttanhnak ti phun khi fak taktak in van ttial ve, asiloah keimah ai ti vemi pakhat comment ah fak nawn i van tongh ahcun nihnih-khat cu online ah lar a fawi ngai. Nain, hi bantuk lei lar cu midang nih zeitindah an ka hmuh ning a si lai ti ka ruah ah kai let tthan hoi.

3. Community/ Committee/ Fellowship Chairman

Chin miphun tamngai kan umnak Malaysia ahhin Community/ Committee/ Fellowship tibantuk hi a tam taktak caah chimluan deuh ahcun Chairman zong hi tanbo tuk cawk lo an si. Riantuan ni zongah riantuan lem loin smart tein hnipuan ai hruk pinah a paw a puar pahmi ka hmuh hna paoh ah zeibantuk Chairman tal cu a si theo lai tiah ruah ka hmang theo.

Zeibantuk tal ah dek Chairman ttuan ve ninglaw ti ka ruat. Chairman felmi tampi an um, nain fiang tein chim ko ahcun Community asiloah Committee tibantuk ah ningcang loin phaisa ei hamngmi Chairman cu chia rih usih, Khrihfa bu (Fellowship) phaisa hmanh ningcang loin a ei ngammi Chairman an um tikah phaisa ei hmang Chairman hna ah an ka ruah ve sual lai ti ka phang. Cucaah, Chairman si ve ninglaw tiah saduh ka thahmi cu kai let tthan.

4. Evangelist

Evangelist tu ttuan ning tiah ka saduh thah cu ka let tthan. Camping le Crusade tuah dingin Fellowship nih cahmi Evangelist an um bantukin zei Fellowship hmanh nih cah lem loin a rak rami Evan zong cu an um ve. Hlan deuh hna ah cun Malaysia ah a ummi lila chungin Free Evangelist ka si a rak i timi zong an rak um, nain an tlau cang rua. Fellowship nih cah lem loin Evan cheukhat cu Malaysia ah rat an hmang.

An rat tikah taklawng kir sual lai phan ah thawngtha chimnak hmunhma lungrethei in tuaktan piak haumi hna an um. Mipi cheukhat lungthin ah Evan cheukhat hi cu Calvary Sumdawng phun khin hmuh an si. Ka sining le ka nunzia kai zoh ah Evangelist ttuan ding cu ka thlingza tthan. Zeicatiah, mah nunnak ah chunglei hrinthannak taktak ngei lem loin pawcawmnak sawh men ah Evan min a hmangmi ka si lai ti ka phang.

A donghnak ah saduh ka thahmi pakhat a um. Kan Laimi an si ah, miphun dang an si ah, bawi an si ah ka sin i a rammi paoh cu ka chimmi an zulh a hau. ‘Kun’ ka ti ahcun an kun lai, cho ka zohter hna ahcun an zoh lai, sirlei ka zohter hna ahcun an zoh lai. Nawlngeihnak sangpi ka ngei ka ti caah ‘A nuam hih!’ ka ti.

Hi rian cu riantha a si, ttuan hrimhrim ding a si ka ti. Nain, riantha tuk le nawlngeihnak sang tukah ka ruahmi rian tiah ka ruahmi ka saduhthah ‘sammeh/ luhmeh rian’ zong cu kai let tthan hoi. Fangkhat hmanh a dih lo nain a nuam ngai ka timi ‘saduhthah’ hmanh hi tuchan ah cun a rak fawi lo hme hi.

Note: Umhar phen saduhthah sawhmi a si caah phundang in ruah lo ding.

Caṭialtu: Hmung Hmung theihpinak in tarmi si

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.