Trump ruangah Lahwahkah (DHS) Vuanci nu Nielsen ai phuak

Trump ruangah Lahwahkah (DHS) Vuanci nu Nielsen ai phuak

US ram chungah phungninglo in ramdangmi tamtuk an luh ruangah President Donald Trump nih Lahwahkah (DHS) Vuanci nu Kirstjen Nielsen cu a sik lengmang i Zarhpini zaan ah Trump sinah phuahnak ca a ttial lawlaw.

Ramri Vennak Lutlai pa Kevin McAleenan nih caankarlak DHS Vuanci a ttuan chung lai. Trump nih amah hi Vuanci taktak ttuan thai dingin a thim te lai maw ti cu hngalh a si rih lo.

Nielsen hi 2017 in DHS Vuanci a ttuanmi si. Liamcia kum tlawmpal chung DHS Vuanci vialte lakah a cian bik si. Phungninglo in US a lutmi paohpaoh cu tlaih viar dingin policy a tuah i ngakchia le an nulepa tiang thongin ah a tthen dih hna.

Nain, mah bu cun US ah phunginglo in ramdangmi a lutmi an tam tuk peng caah Trump nih a sik chih lengmang i ai phuah behnak si ttheo lai, tiah zumh a si.

“Mithar sinah tlamtling tein rian pek a herh caah Nithumni tiang cu ttuan rih ko an ka ti caah Nithumni tiang cu ttuan rih dingin ka lungtling,” tiah Nielsen nih a chim.

Trump nih cun US ramri ah phungninglo ramdangmi tlaih in thongthlak le US cozah tangka in cawm len khi a duh lo. US ram chung hrimhrim ah lut kho hna hlah seh, ramri hrimhrim phit usih ti a duh.

2018 i cabinet meeting lio zongah Trump nih Nielsen cu “zei ruang dah ramri cu na phih ko lo, ramri ah minung tlaih zong a hauh ttung lai lo” tiah a rak hro cang.

2018 November thla dongh lai zongah, “Nielsen hi i phuak seh” tiin Trump nih a rak ti nain a lung ai thleng tthan rua, a rak phuak thai lo.

Nain 2019 March thla ah ramri ah phunginglo ramdangmi 100,000 bak an tlaih hna i US thonginn zong an khat dih, anmah rawl peknak caah US cozah tangka ceilak a dih caah Trump cu a thinhung tuk tthan.

Trump nih a sik tthan caah ai phuahnak si ko lai, tiah an zumh cio. Vox, New York Magazine, Reuters

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.