Trump: Pu Kim na cungah kaa lawm, tuan ah i tong tthan dingin kaa ruahchan

US President Donald Trump nih North Korea President Kim Jongun cu “tuan ah i tong tthan dingin kaa ruahchan” a ti.

“Kum 19050-1953 Korea Ral lio ah a rak thimi US Ralkap ruak pawl US ram ah na kan kuat caah kaa lawm,” tiah Kim Jongun cungah aa lawmhnak zong a chim.

“Cun, biattha ttha in ca na ka kuatmi cungah kaa lawm – a rauh hlan ah i tong dingin kaa ruahchan,” tiah a nolh.

June thla i Singapore ram ah Pu Trump le Kim an rak i ton lio ahkhan “US ralkap ruak pawl kaan kuat lai, nuclear hriamnaam pakhat hmanh taang loin ka hlawt dih lai,” tiah Pu Kim nih bia a rak tiam.

Trump: Pu Kim na cungah kaa lawm, tuan ah i tong tthan dingin kaa ruahchan

Pu Kim nih July thla tanttim ahkhan, “avoi 2nk i tong tthan usih law ka duh ko…,” tiah ca a rak kuat. Trump nih tuni ah “bia tthattha in ca na ka kuatmi..” a timi hi mah cu a si hnga maw ti balte cu fiangin kan thei kho rih lo.

Vice President Mike Pence nih Hawaii state ah US Ralkap ruak pawl sunglawi taktakin a vuipi mi hna zong Pu Trump nih Twitter in a thangtthat len.

“Chairman Kim Jongun nih a biakam a zulh i, Korea ram ah daihnak ser kan i zuammi zong tthatlei a panh chin lengmang ko ti cu nihin ah mit-hmuh kut-tongh khawh tiangin kan hmuh caah President Trump aa lawm ti ka hngalh,” tiah VP Mike Pence nih a chim.

VP Mike Pence apa hi Korea Ral lio ah ral a rak tu vemi US Ralkap a si.

Korea Ral lio ah US Ralkap 7,700 leng an rak tlau. Mah chungah 5,300 hrawng cu atu i North Korea ram ahhin an rak tlau.

Trump Pu Kim na cungah kaa lawm, tuan ah i tong tthan dingin kaa ruahchan

South Korea le North Korea an rak i tuk lio ahhin South Korea a bawmtu US Ralkap 33,651 cu ralram ah an thi, adang 3,262 zong kuan hma le adang zawtnak tuar in an rak thi.

South Korea a rak bawmtu ramdang ralkap (UK, Australia le Canada) pawl zong an rak thi, an rak tlau len ve.

“Kum tamtuk a luan cangmi mithi ruak-pelpawi dihlak check i mah hi anih ruak a si tiin fehter dih ding cu kum tampi a rau kho,” tiah forensic nih an chim.

US Ralkap ruak-pelpawi pawl Hawaii state ah an zuanpi hna hlan ah South Korea ram ah US Ralkap cazin tlaitu zung lutlai John Byrd nih, “US ralkap an si.. tiin North Korea nih a kan pekmi pawl hi atutiang kan zohnak ahcun a si tak tiin kan ruah ko,” tiah thawngla pawl a chimh hna. – Reuter le CBS News

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

LEAVE A REPLY

Please enter your comment!
Please enter your name here