Trump nih ‘Batman music’ a hman caah Twitter nih a delete piak

Trump nih Batman music a hman caah Twitter nih a delete piak

Washington — 2020 Election a nai chin lengmang cang caah Trump team pawl nih Twitter ah video in campaign tuah an i thok cang.

Minutes 2 a saumi video an tuahmi cu President Trump nih a Twitter account ah a tar i “Make America Great Again (America A Lian Nganter Than)” tiin a ttial.

Video chung ahcun “Hmasa ah zei an in rel lo. Cun an in nihsawh. Cun miphun thleidan hmang tiin an in auh. Donald J. Trump. Na vote. An palh dih kha tehte na langhter. Trump: Teinak Lianngan, 2020” tiah The Dark Night Rises font hmangin an ttial.

Mah video ahcun Batman movie i “The Dark Knight Rises” music an telh chih rih. Music copyright ngeitu sinah nawl hal hmasa loin an hman ruangah copyright ngeitu Warner Brothers company nih Twitter company sinah a report.

Warner Brothers company aiawh biachimtu nih “President Trump nih amah nawl in kanmah tuahmi The Dark Knight Rises music a hman. Delete dingin upadi ning tein rian kan ttuan lio a si,” tiah cathanh a chuah colh.

Nihnihni zaan ahcun Trump video cu Twitter company nih a delete piak i “Mah video hi copyright ngeitu nih a report caah kan hlonh” tiah a cuanter.

US ram ahcun President hmanh nih amah nawl in mi music hmannak nawl a ngei lo. Kawlram ahcun …

Trump nih amah i cawngia nak caah pop style zong aa rak cawn bal cang.

“Game of Thrones” poster i “Winter Is Coming” timi bantukin poster hna ai rak tuah i “Sanctions Are Coming” tiin a rak ttial ve.

Mah lio cun Game of Thrones ngeitu HBO nih “kan hmelchunhnak le kan bia pawl ningcang loin ramkhelnak caah an hmanmi cu kan duh bak lo” tiah cathanh a rak chuah. — NBC News, Variety Magazine le Chicago Tribune


Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.