Trump hnulei ah ‘President seal deu’ a cuantertu rian an phuah

US President Trump cu Nihnihni zingka ahkhan Republican ttanhtu siangngakchia bu ‘Turning Point USA (TPUSA)’ member 1,500 hmai i bia a chim lio ah, a hnulei um screen nganpi ah ‘amah nehsawhnak US President seal/ttazeih deu’ a hung cuang.

Seal deu cu President Trump a hnulei ah caan tlawmpal chung a cuang. Atang video ah zoh khawh si.

TPUSA lutlai nih, “kha bantuk thil a canmi cungah mipi ngaihthiam kan in hal hna. White House le President upat lo in tuahmi asi hrimhrim lo. Kanmah zong nih kha bantuk thil cu kan cohlang kho lo,” tiah a chim.

“TPUSA caah muicawl le aw a tlaitu minung pakhat nih online ah president seal a kawl i ttha tein check ta loin a hmuhmi paoh a hman ruangah a cang sualmi si,” tiah a chim.

TPUSA caah muicawl le aw a tlaitu cu rian an phuah colh.

Seal deu cu liamcia kum 2 lio ah Charles Leazott timi pa nih a hawile capo nak caah PhotoShop in Trump nehsawhnak a rak tuahmi seal asi.

A tuahtu pa cu Washington Post thawngla nih bia an hal i a nihchuak ngaite. “Mah seal deu pi bak President Trump hnulei ah a cuanter tu hi cu a molh taktakmi asilole nek a nei taktakmi si lai” tiah a chim.

A raangmi hi adeu a cuangmi cu si. A aihre mi hi US President seal taktak asi. Aa dannak na hngal kho maw?

1) Mupi lu: Seal deu ahcun lu 2 a ngeimi mupi a cuang. A taktak ahcun lu 1 a ngeimi mupi a cuang. — lu 2 a ngeimi mupi cu Russia seal ah a cuangmi si. Trump kha Russia nih a bawmh caah president a ngah, an rak ti len.

2) Mupi ke: Seal deu i mupi nih a kehlei ke in kohti tuknak fung tampi aa put. A taktak ahcun fei 13 aa put. Fei 13 nih a sawh duhmi cu hlan lio i American colony 13 kha asi — Trump hi President a ttuan hnu ah amah ngeihmi kohti kun ah ni 210 leng bak caan a hmang.

3) Ca aa ttialmi: US president seal ahcun “E pluribus unum” ti aa tial. Latin holh asi i a sullam cu “tampi in, pakhat” tinak asi. State tampi i fonh in ram pakhat ah an dirmi kha a chim duhmi si.

Nain, seal deu ahcun “45 es un títere” ti aa ttial. Spain holh asi i a sullam cu “45 cu chak tlaihmi tunu asi” tinak asi. 45 cu Trump ati duhnak si, Trump cu 45nk US President asi. — President an rak i cuh lio ah Hillary Clinton nih “Trump cu Russia President nih chak a tlaihmi tunu asi” a rak ti. Trump nih biatak tein a rak al.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.