14.1 C
Hakha
Tuesday, September 21, 2021

Trump acozah nih tangka a pek duh lo caah California state nih tazacuai

Obama acozah nih 2010 ah “a rang taktakmi tlanglawng lam sernak” caah tiin California state tangka a rak pekmi $1 billion deng cu Trump acozah nih a chuahpiak duh hna lo.

Mah ruang cun, California state le state Tlanglawng Zung nih Trump acozah cu “tangka kan pe seh” tiin taza an cuai.

San Francisco khuapi i rampi biaceihzung ah taza an cuai. “U.S. Lamsul Zung nih California state tlanglawng lam caah tangka $929 million a kan pek duh lomi hi pek lonak nawl a ngei lo,” tiah tazacuainak ca chungah an ttial.

“Cun mah kan tangka hi Rampi Tlanglawng Lam Zung (FRA) nih rian dang ttuannak caah hman tim hlah seh, kan pe hrimhrim seh,” an ti.

Kan hnu zarh ahkhan FRA nih, “California state nih phungphai na buar lengmang ruangah tangka $929 million rak kamhmi kha kan in cancel piak, cun hmasa ah na chuah cangmi $2.5 billion zong kan khirh tthan,” tiah thawng a thanh caah atu bantukin California state nih Trump acozah taza a cuai hi si.

Los Angeles khuapi in San Francisco khuapi tiang meng 520 sau tlanglawng lam tuah in kum 2033 ahcun suimilam 1 ah meng 220 a phan khomi tlanglawng rang taktak hman khawh ding in, California state nih saduh a rak thah.

California state cozah hruaitu Governor Gavin Newsom nih February thla ah “thil man a kai tuk caah hmasa kan i tinhmi kan tuah kho lai lo, Merced le Bakersfield khua kar meng 119 lawng hi kan tuah lai,” tiah a rak chim.

Trump nih “a khua hmete in a khua hmete tiang lawng tuah a duh mu, zei dah santlaihnak a ngei, tangka a dih ding zong a tamtuk i a phu lo, i tuah lawlaw hlah seh,” tiah a rak tlerh.

California state mipi nih tlanglawng lam sernak ding ahcun tangka $10 billion i hmang seh, tiin 2008 ah vote an rak thlak.

2010 ah President Obama acozah nih rampi cozah tangka $3.5 billion an chap hna.

2018 March thla ahcun, a dih ding tangka dihlak hi $77 billion a si lai tiah California state cozah nih a thanh. Thil sining a hngalmi nih “$98 billion leng hmanh a dih kho” ti tiangin an chim.

Mah ruangah President Trump nih i tuah lawlaw hlah seh a ti i rampi cozah tangka $3.5 billion chungah an chuah rih lomi $929 million a chuahpiak duh ti hna lo hi si. — Reuters

Malaysia
2,112,175
Mizaw Hmuhmi
Updated on September 21, 2021 8:39 am
Malaysia
1,880,733
A Dammi
Updated on September 21, 2021 8:39 am
Malaysia
23,744
A Thimi
Updated on September 21, 2021 8:39 am
Malaysia
207,698
Zaw Liomi
Updated on September 21, 2021 8:39 am

Ṭial Tharmi