Tial Cung Thang cu Lal Sang Lian nih boxing a singkhaw

Chinmi tampi nih i zohthla ngaimi Tial Cung Thang cu Lal Sang Lian nih boxing i thong dingin a singkhaw.

“A umtu le a tthut to ka mit kem tuk cang. Round 2 hlei kai rauh lai lo. Laimi nih kanmah 2 puai hi rak kan tuah piak hnik uh” ati.

Naite i Tial Cung Thang nih WPC Middleweight World Champion a comi thawngpang kha a Facebook ah aa share i atanglei bangin a singkhaw nak cu a ttial.

“Tu lio i a lar ngaimi kan Lai pathawng Tial Cung Thang hi zei dang ti lo boxing bak ah singkhaw a ngamh hnga maw?

“Ngah ahcun singkhaw ka duh ngai. Phaisa ruang ah si loin a um tu le a tthut to hi ka mit ah a rem lo tuk cang.

“Laimi nih kanmah 2 puai hi rak kan tuahpiak hnik uh. Kawlram ah Myanmar National team tiang boxing aa thong vemi cu ka si. Hi ek ceh cu round 2 hlei ka thong lai lo. Ka singkhaw bak ko hih,” tiin Lal Sang Lian nih a Facebook ah a ttial.

Minung pakhat nih “i phomh ulaw zoh kan duh bak hna…” tiah a comment.

Lal Sang Lian nih, “I phomh ding cu ready peng ka si ko. Anmah MMA zong in ka ngamh tthiam. Round 2 pin hi a kal manh lai lo. Nain puai hi tuah a har ngai. Kei cu Kawlrammi ka si. Annih US refugee an si le umtonak aa dang i mu,” tiah a leh.

“Kum le khua in kan i dang ngai ko nain tu i an Tial Cung Thang hi ka mit ah a rem lo ngai. Boxing tha tein ka rak i thongh ve tik ahhin ka mit thi cu thak bak. Round 2 tiang ah puai piat (knockout) in ka thei khawh lo cun a sung ka khan bak lai,” tiah a peh.

Minung pakhat nih “Tial Cung Thang maw na challenge. Ningzak na si. Anih na chuak lai” tiin a comment ve.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.