26.5 C
Hakha
Monday, June 1, 2020

Thongthlakmi Reuters thawngla nih ‘UN Press Freedom’ laksawng an ngah

- Advertisement -

Yangon — UN nih “tu kum Press Freedom Prize cu Myanmar ram ah thongthlakmi Reuters thawngla Wa Lone le Kyaw Soe Oo kan pek hna,” tiah thawng a thanh.

Wa Lone le Kyaw Soe Oo cu Myanmar ralkap nih Rohingya pawl an thahmi hna kong media ah an ttial ruangah thong an thlak hna.

UN-ESCO prize lutlai Poland thawngla Wojciech Tochman nih, “Rohingya pawl thah an tonnak kong an hlat ruangah Reuters thawngla 2 cu thongthlak an tong,” tiah laksawng an peknak hna aruang a chim.

UN Press Freedom laksawng cu 1986 ah Columbia khualipi Bogota ah thi lakin an rak kahmi Columbia thawngla pa min chuankan in ‘The Guillermo Cano prize’ tiah an auh.

Laksawng peknak puai cu Ethiopia ram ah a ra laimi May 2, Vawlei Pumpi Media Zalonnak Ni acu ah an tuah te lai.

Minung covo aukanhtu hna nih “Myanmar cozah nih na rammi thawngla 2 thong na thlakmi hna hi Rohingya na thahnawnmi hna kong mi theihter na duh lo ruangah a si…” tiah Myanmar cozah an mawhchiat len.

Reuters thawngla 2 cu Rakhine state i Inn Din khuate ah ralkap nih tuksapur in an thahmi Rohingya 10 kong an rak hlat lio 2017 December ah palek nih an rak tlaih hna.

‘Rakhine state ah ralkap le palek cawlcanghnak kong thlithup cazin nan ngeih’ tiin taza an cuai hna i kum 7 thong an thlak hna.

Rakhine state um Rohingya pawl cu ralkap nih an velh hna, tlaihhrem hna, an thah hna i inn an khanghpiak hna ruangah minung 740,000 leng Bangladesh ram ah mitthli he an rak zaam.

Myanmar ralkap tuahsernak cu UN nih “miphun dawi” a si ti tiangin cathanh a rak chuah.

February thla ah sihni pawl nih Myanmar Biaceihzung Sangbik (Supreme Court) ah nawlnak an tuah nain zei cukha a leng rih lo.

“Ralkap nih kum 60 leng Myanmar ram an uk i ramdang he pehtlaihnak an rak ngei lo, 2015 ah mipi thimmi cozah a hung kai hnu in vawleipi nih a hung theih deuh hna, atu cun Wa Lone le Kyaw Soe Oo thawngpang nih vawlei pumpi a cul dih cang,” tiah Tochman nih a chim.

Myanmar ram democracy ngahter dingin aa rak zuam ruangah Nobel daihnak laksawng tiang rak pekmi Aung San Suu Kyi cu atu hi Myanmar ram hruaitu asi cang i amah nih a ngaihthiam hna ahcun an luat ding asi ko nain a ngaihthiam duh hlei hna lo. — AFP

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...