Theihtlei – Vawlei cung ah Singapore le South Korea internet an rangbik

Hri in inn ah bunhmi (fixed broadband) internet/wifi vialte lakah Singapore ram ta hi a rang bik si, tiah internet nuarhran hneksaktu Ookla nih tuni ah a thanh.

Nain, phone internet ahcun South Korea internet a rang bik.

Singapore inn internet (fixed broadband) nih cun buaktlak in second pakhat ah 195.88 MB a nganmi file a download khawh.

Inn internet (fixed broadband) a ran biknak ram 10:

  • Singapore = 195.88 Mbps
  • Hong Kong = 173.53
  • South Korea = 144.99
  • Romania = 128.88
  • Andorra = 128.48
  • Monaco = 123..12
  • United States = 119.09
  • Switzerland = 116.98
  • Liechtenstein = 113.49
  • Hungary = 112.37

South Korea ram ahcun na phone internet (mobile internet) in 90MB a nganmi file khi second pakhat ah download khawh asi.

Phone internet a ran biknak ram 10:

  • South Korea, 90.06
  • Norway, 64.80
  • Canada, 63.63
  • Australia, 63.20
  • The Netherlands, 60.31
  • Qatar, 60.09
  • United Arab Emirates, 57.45
  • Switzerland, 52.03
  • Croatia, 51.62
  • Singapore, 51.11

Acunglei ram pawl hi an ram cio ah phone le inn 300 lengin internet an hneksak hnu ah rank pek an si. — AFP

Acunglei hi an ram pumpi internet nuarhran buaktlak (average) asi.

Khuapi cheukhat ahcun acunglei langhtermi nak let tam tukin a rang deuh.

Seoul khuapi hmun cheukhat lebang ahcun April thla khan 5G internet a ngah cang i Samsung Galaxy 5G phone in suimilaam 2 le cheu a saumi movie khi seconds 5 ah download khawh asi. Second 1 ah 500 MB a download khawh.

US ram Washington DC le khuapi dang cheukhat zongah Verizon 5G internet a ngah cang.

Verizon simcard le Samsung Galaxy 5G phone a hmangmi nih cun second pakhat ah 500MB video/hla an download khawh cang. 8GB a nganmi 4K movie pakhat khi 5 minutes ah a download dih. Kawlram internet nih cun ni 2 chung hrawng ai rauh lai.

5G internet cu 4G LTE nakin let 100 tluk a rang deuh. 5G internet cu phone paoh ah a ngah rih lo. 5G modem bunhmi phone Samsung Galaxy 5G pawl lawngah a ngah. iPhone ah a ngah rih lo, Apple company hi an khul nuar ngai.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.