US, Texas state ah vanlawng hme a tla i minung 10 an thi

US, Texas state ah vanlawng hme a tla i minung 10 an thi

Zarhpini zingka sml 9 (US caan) ah US ram, Texas state ah vanlawng hmemi (twinjet) pakhat a tla i aa citmi minung 10 an thi.

Vanlawng ahhin khualtlawng 8 le vanlawng mong 2 an i cit. Florida state i St. Petersburg khua ah zuan an timh lio ah a tlak hi a si.

“Vanlawng cu Dallas khua chaklei in meng 20 hrawng a hlatnak Addison Municipal Airport um inn pakhat cungah a tla i aa citmi an thi dih,” tiah Addison khua aiawh khuabiachimtu Mary Rosenbleeth nih a chim.

Beechcraft BE-350 King Air phun vanlawng cu zuan aa thokka ah a tla i inn cung a tlak hnu ah a kaang. Vanlawng kangmi cu meithat nih rianrang in an hmih khawh. Nawlngeitu nih vanlawng tlaknak a ruang an kherhlai lio a si. _ NST