Myanmar model Sue Sha Htet nih a tlangval tthing hlasa minthang Issani cu 2018, April 10 ahkhan tlaihhrem case telhin sualnak case 3 in Tamwe khua biaceih zung ah taza a rak cuai.

Issani nih ngaihthiam a kal hal ahcun taza ka cuaimi let dih dingin min ka thut lai tiah August 5 ah tazacuaitu Sue Sha Htet nih a chim. A chim ning bantuk in a tuah.

Issani cu thonginn ah kum 1 thla 4 a um cang.

“Tangka fangkhat hmanh ka la hna lo. Anmah he bia kan i ruah lio zongah ka chimh ko hna. Tangka kong ka khat hmanh chim hlah uh. Tangka kong theih ka zuam lo. ‘Ka palh ko’ tiin ngaihthiam nan ka hal khawh lo ka ti hna.”

“Keimah cu ‘ka palh ko, ka ngaithiam’ ti lawng kha ka duhmi cu si ko. Tuni ah amah Issani le a nu nih kan ngai thiam ko tiah an ka ti ruangah case vialte khar dih dingin biaceih zungah ca ka ap. Issani nih ‘kaa lawm’ a ka ti. ‘A ngah ko, tuante ah ngaihthiam na ka hal lo cuta’ ka ti ve,” tiah Sue Sha Htet nih a chim.

“Minung cu palhnak tuah bal lo kan um lo. Cucaah, Issani hi a rian (hlasak) in a rak kir tik zongah mipi nih thazaang rak pe dingin kan sawm hna,” tiah a chimchap.

“Kei cu hringtu nu ka si ruangah ngaihthiam hal cu ka rian si ko. Ka fapa cu inn a tin ka hngahnak a sau cang. Ka fapa cu dawtnak le zaangfahnak thinlung he a ngaihthiam caah kaa lawm tuk,” tiah Issani a nu nih a chim.

“Tazacuaimi let dingin thil a tuahmi cu kaa lawm tuk. Baby zongkha ‘kaa lawm tuk’ tiin rak ka chimhpiak uh,” tiah Issani nih a chim ve.