18 C
Hakha
Tuesday, September 21, 2021

Stanford University luh khawhnak caah $6.5 million in ziknawh piakmi nu nih “ca kai zuam ruangah si” a ti

China nu Molly Zhao Yusi cu 2017 ahkhan US university minthang bik a si vemi Stanford University ah kai dingin cohlan a rak si. University nih an cohlannak kong a chim lio video (minutes 90 sau) cu online ah a rak tar.

“Hello, kum 17 ka si. Fakpi in ka zuam ruangah ca ka tei i Stanford University nih an ka cohlanmi si, nannih zong nan i zuam ahcun hi bantuk vawlei cung minthang bik university ah nan kai kho ve ko lai…,” tiah a chim.

“Na nulepa an rum ruangah Stanford University nih an in cohlanmi si lo maw aa ka timi hna nan um sual lai, American university pawl nih cun kan nulepa an rum/lo an hngal lo,” ati.

Nain, US media minthang taktak a simi Wall Street Journal nih mah nu kong cu an hlat tikah Stanford University kai kho dingin a thiamnak nih a tlinh lo caah a nulepa nih university luhnak kong ruahnak cheutu pa William Rick Singer sinah $6.5 million ziknawh piakmi a rak si ziar.

William Rick Singer nih lih hrokhrawl in aung-lat-hmat a tuahpiak ruangah Stanford University nih rak cohlanmi a si.

Wall Street Journal nih a phuan cangka in Stanford University nih Molly Zhao Yusi cu a phuah colh. $6.5 million cu thatse cung ti thlet bang an sung diam.

Stanford University luh khawhnak caah nulepa nih $6.5 million in ziknawh piakmi nu nih “ca kaa zuam ruangah a si” a ti

Molly Zhao Yusi a pa Zhao Tao hi China rammi a si. Apa hi sii company Shandong Buchang Pharmaceuticals ngeitu mirum taktak a si i Forbes nih ‘$1.8 billion a ngei’ a timi pa a si. A rum tuk ruangah Singapore citizen zong a ngah i atu cu Singapore ah an um.

Vawlei cung university minthang bik US university pawl ah kai cu ahopaoh nih an duh tuk cio. Nain mah university kai khawhnak ding ahcun ca thiam taktak (mark tthat taktak) a herh caah mirum pawl cu an mark nih a phak lo tikah ziknawh rumro in an ttang.

US ram chung university minthang kai khawhnak dingah ziknawhmi tangka dihlak hi US$25 million a si, tiah US cozah sihni pawl nih an phuan.

Ziknawh hmang pawl lakah Hollywood minta/mintami pawl le company CEO pawl zong tampi an i tel.

China nu Sherry Guo zong minthang taktak a simi Yale University ah kai a duh nain a thiamnak nih a tlinh lo caah a nulepa nih William Rick Singer sinah $1.2 million in zik an nawhpiak. Yale University nih a phuah cang.

US university minthang pawl ah an fale kaiter hi China mirum pawl nih biatak tein an i zuam, an kai khawhnak ding si ahcun tangka million tampi dih an ui lo, upadi buar zong an ngamh. — Channel News Asia le USA Today

Malaysia
2,112,175
Mizaw Hmuhmi
Updated on September 21, 2021 9:40 am
Malaysia
1,880,733
A Dammi
Updated on September 21, 2021 9:40 am
Malaysia
23,744
A Thimi
Updated on September 21, 2021 9:40 am
Malaysia
207,698
Zaw Liomi
Updated on September 21, 2021 9:40 am

Ṭial Tharmi