Malaysia siangpahrang hlun Sultan Muhammad V nih a nupi Russia queen nu cu kum 1 hnu ah a tthen colh. Fa an ngeihnak zong thla 2 lawng asi rih. 2019 May 21 ah fapa te an ngei.

Sultan Muhammad V (kum 49) le Miss Moscow a ngahmi Russia nu Oksana Voevodina (kum 27) cu 2018 November thla ahkhan Russia ram ah tthitumnak puai an tuah.

Malaysia thawngzamhca NST nih, “2018 June thla ah mipi theih loin Malaysia ah tthitumnak puai an rak tuah cang. 2018 November ah mipi theih in Russia ah an tuah tthanmi si,” tiah a ttial.

UK thawngzamhca The Sun nih, “a nupi hi Russia ah reality TV show ah lemcang a ttuan tawnmi si. 2008 ah Russia nungak no tete 11 cu Mexico ram inn ttha tak ah an kalpi hna. Oksana Voevodina nih min deu ai bunh i tidil chungah pa he nupa sinak an tuah…,” tiah a ttial.

An i um ti thawngpang a than cangka in mah (tidil chungah pa he an sual) lio video cu social media ah an tar i linsa tukin an ceih.

“Mah cangka in an nuva kar ah bia alnak le i theihthiam lonak a chuak peng, tiin biachokvai a leng,” tiah The Sun nih a ttial.

A thangchiat tuk caah Malaysia siangpahrang Sultan Muhammad V cu 2019 January ah Malaysia siangpahrang in ai din i a chuahkehnak Kelantan state ah kir i Kelantan state siangpahrang a ttuan.

An i tthennak kong cu atutiang Kelantan siangpahrang inn nih a thanh rih lo. An rak i um lio zongah Siangpahrang inn nih thawngthanhnak a rak tuah lo.

Malaysia thawngzamhca NST nih, “June 22 ahkhan Singapore Syariah Court ah tthennak ca an ap i July 1 ah tlamtling tein an i tthen cang,” tiah a ttial.

“Tthennak certificate chungah ‘talak’ ti voi 3 ai tel. Muslim phung ahcun ‘talak’ ti voi 3 chim in tthen cu a fak bikmi nupi tthen asi i zei tik hmanh ah i umh tthan a ngah ti lo,” tiah a fianter.

Mah 21 ah an ngeihmi fapa te

Russia nu nih Malaysia siangpahrang he an ngeihmi fapa te a ke a tongh lio hmanthlak cu Instagram ah a tar i “21 May 2019 — ‘hmasa’ le ‘a hnu’ tiin ka nunnak aa tthen ni,” tiah a ttial.

“Nu cu fa an ngeih hnu ah.. ti an rak ka chimhmi vialte kha a hmaan dih. Hi dawtnak cu a sunglawi khun. Hi tem ning (feeling) cu a thar te si. Kan fapa ka zoh ah Allah le ka va cungah kaa lawm. Atu cu 3 kan si cang,” tiah a peh.

“Kan fapa min tling cu Tengku Ismail Leon Petra Bin Tengku Muhammad V Faris Petra asi,” ti zong a phuan.

Mi tampi nih “a va he an i tthen cang ti thawngpang kan relmi cu a dik maw?” tiah an comment len nain a let hna lo.

Charhchan: NST, News Australia, The Sun, The Straits Times

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. The Chin Express dirh a duh caah 2017 ah RSC ah rian dinhnak ca a ap i ni fatin Chin thawngpang le vawlei cung thawngpang phunkip a ṭial.