Shwe Kyar: Sangte hi harnak a tong taktakmi si

Sangte a bawmtu Kawlnu Shwe Kyar cu Zalen Media nih tu zingka ah phone an chawnh i “Sangte hi harnak a tong taktakmi si ko,” tiah a chim.

Shwe Kyar: Sangte cu Chinmi sit bak asi. An inn kong a chimmi zong a dik. Hlan ah a vapa hi Dala khua ah a ummi si. An inn in inn 3nk ah a ummi nu he zahan ah kan i chawn kho. A vapa hi nupi tampi a ngeimi si. A vapa anu cu thilsuk in aa cawmmi, hmuh chom ei chom in lamkam ah a kawlhawl vemi si.

A vapa anu nih Sangte hi a cohlang lo. A vapa he an um tti lonak zong a sau ngai cang. Nain, “fa ka ngeih hlan ah” a timi kha cu a dik lo. Fa a ngeih hnu ah a fate le a vapa he a vapa anu inn ah an rak leng rih ko.

Sinain, harnak a tong taktakmi cu asi. Aamah ka khan ngam. Chinmi nih nan hmuh tiang kawl in Chin ram ah nan tlunpi hau. A tlun duh lo ahcun, hnulei in minung pakhatkhat nih an tlerh maw si, zei dah si ti pakhatkhat um lai.

Hnulei in fialtu a ngeih/lo cu ka hngal ve lo. Mi pakhatkhat nih umnak inn pek in kutdok a ttuanter si hnga maw. Sangte hi va lak tthan hrim a hau. Harnak a tong taktak ko. A lih si hrim lai lo. Aruang cu, aa ka chimh ning kha umnak a ngei tak lo ti a fiang.

23nk Lam, 25nk Lam le Thein Gyi Market hrawng ah nan kawl cun nan hmuh ko lai.

Thil sining taktak cu, zahan i sizung ka kal lio ah “Ma Kyar, ka khin Chin nu pakhat Laitlang tlun ka duh tiin tlunnak lansazeih bawmh a hal” an ka ti.

Mah ruangah, “bawmhnak petu kan unu a phanh tiang hngak rih an ti. Ka va kal ahcun, bia an rak hal dih cang. A chungkhat nih hmu hna seh tiin Live ka thlahmi si. Comment an ttialmi i ‘Chin miphun mualphoh na duh’ an timi kha asi lo. Lar ka duh ruang zong asi lo.

Tlun a duh komi zei ruang dah Sule a va phanh tthan ti cu a ruah awk zong ka hngal lo. Aruang cu amah ton khawh lawng ah a fiang lai. Hmanthlak i a pawng i mipa kha nudokpadok asi an ti.

Sule in an hmanthlak a kan kuatu zong nih ‘ka u, mahpa cu nudokpadok alo’ an ka ti. Car gate ah kan va thlah ahhin laingka in an kir tthan. Laingka aa tonnak cu Sule sikaw, nudokpadok nih hin Sule in a rak hngah i si lai cu.

Chin miphun cu nan i lungrual. Nan miphun pakhat harnak a tonmi nan zoh kho lo i Chin state pumpi in mi tampi nih phone an rak ka chawnh. — Zalen

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.