3 days in Washington DC attending the Ministerial to Advance Religious Freedom at the US Department of State. Day 1 @ State Department. Day 2@ US Institute of Peace. Day 3@ US Congress Senate Russel Hall talking about the state of Religious Freedom in Burma.

Kumtam nawn ka phanh tilo nak Washington DC kava phan tthan. Rak tlonlen tawnnak, rak cawlcangh nak hmun pawl kava phan tthan I lungthin phundang ngai in a um.

Ruahlo in Secretary of State Mike Pompeo nih US State Department ah an tuah ding mi vawlei ramkip in Minister level pawl nih Biaknak zalonnak kong an icheih mai nak ding conference ah rak kai ding in an sawm e ti asi. Cu conference ah cun vawlei ramkip in cozah lei aiawh tu Minister level pawl, biaknak lei hruaitu pawl le kanmah bantuk nuhrin covo kong ah a ttuan mi pawl sawm kan si.

Secretary of State rilmal I sawm ah cun kai rilmal dah he tiah karak kai lai nan ka sawm caah ka lawm tiah ca ka leh hna. Anmah State department nih ka khualtlawnnak, ka tthutdir nak le zeizong te an ka tuaktan piak caah tlam a tling ngaingai. Washington DC ka phanh lo nak zong cu a sau cang caah thinlung phundang in a um. Vawlei cung ramkip in cozah lei hruaitu hna, Biaknak lei hruaitu hna, le keimah bantuk nuhrin covo kong a ttuah mi pawl tampi hawikawm tthing he hawikom thar he ka hmuh hna.

Mah meeting ah cun US cozah lei in Secretary of State Mike Pompeo nih pumhnak a hun, House Speaker Nancy Pelosi, Secretary of Health and Human Service Alex M Azar II hna bia an chim, Britain in Lord Alton le midangdang minthang le mi lianngan pawl zong bia an rak chim. Cu pin ah Biaknak lei hruaitu hna le nuhrin covo lei ah a cawlcang mi pawl zong biachim nak an nei cio. Hi conference ah a bik in a tawlrel tu cu US Ambassador for International Religious Freedom Samuel Brownback asi. Sam Brownback hi US Congressman, Senator, Governor of Kansas zong a rak ttuan balmi asi I US Congress nih International religious Freedom Acts an tuah mi hi a mah nih biatak te in arak tawlrel mi asi.

Vawilei daihnak le tthancho nak ah Biaknak zalon nak hi a biapi ngaingai mi a hung si. Cu caah cun zeitin dah vawlei ramkip ah biaknak zalon nak a len khawh lai, zeitin dah biaknak kalsual ruangi a chuak mi buainak, ral thawhnak, sifah nak le har nak hi kan runven lai I minung tthanchonak kan tuah khawh lai ti kha iceih bik asi.

Kanmah Burma ram zong hi US cozah nih biaknak zalon nak kong ah thindomh in zoh a haumi le ralrin awk siherh awk asimi ram “country of particular concern” ah a chiahmi asi caah Burma ram kong chimrel nak can zong a um ve.

Anikhat nak kha kanzapi hmun khat ah kan tthu hna I a nihnih nak cu phuthum ah kan itthen, cu phuthum chung ah cun phu hme deuh in a mah le kan ceih mi kong cio he phu hmedeuh ah kan itthen chin.

Kei kha a nikhat nak kha State Department ah chun ni ka tla. A nihnih nak kha US institute of Peace ah chun ni ka tla I a nithum nak kha US Congress Russel Senate Hall ah Burma ram kong chimrel nak a aum I Chinmi Kharihfa hna kong le Burma ram ah biaknak zalonnak kong he pehtlai in ruahawk le siaherh in International community le US cozah nih khua nan kan ruahpi a hau timi chim nak can ka nei kho ve.

A dangte in State Department in Bureau dangdang ah ttuanvo neitu upa hna he ton viaruah nak zong kan nei kho.

1999 ah hin US State Department ah Burma Desk Officer kha ton ding in appointment ka rak tuah. Mah cu ka voikhat nak State Department karak ton hna asi. Rev. Rollin VanBik he kan rak kal I State Department kan va phak ah cun Burma desk lawng silo in Bureau for Democracy, Labor and Human Rights pin ah Bureau for Population, Migration and Refugee in upa pa riat nih an rak kan ton. Ka voikhat ton nak asi caah US cozah le State Department I an rumra le huham kha karak cheilo ngai I bia ka chim ah ka thlan hripi nih a rak ka paih.

Tutan hi Chinmi kong ah US State Department ka rak ton hmasa cem hna nak in kum 20 a tlin asi. 1999 in 2009 kar ah hin State Department hi voitam nawnte ka ton hna. Kumkhat ah voihnih, voithum Chinmi kong le Burma ram nuhrin covo kong kan rak iruah lengmang. State Department hi ka ton hmasa hna nak in Kum 20 hnu ah Secretary of State sawmnak in kava phak tthan tik ah a liamcia kum 20 chung ah US cozah nih Chinmi an kan zawnruah ning le an kan run ven ning vun ruah tthan ah thluachuah rel cawklo asi. Khuazing Pathian nih Cozah le nawlnei tu hna thin lung ah rian a ttuan I kan chimrel mi hnihkhat tete thlua a chuah mi ruah tthan tik ah “Bawipa Pathian na tuahmi thil vialte hi, ka ruah tik ah ka lung nih a phanlo” timi hla bantuk asi.

Tutan ah State Department Bureau dangdang in upa hna he a dang te in kan iton nak ah Chinmi dirhmun in siseh, CHRO dirhmun in siseh nan kan runven nak cung ah ka lawmtuk timi bi chimnak can ka hmuh ca ah ka lungsi. Cun, US Congress i Russel Senate Hall ah Chinmi Kharihfa na kan dirhmun le Burma ram chung ah biaknak zalon nak a um lo zia le phung a buartu hna le a kan namnet tu kan biaknak le kan miphun hloh a kan timtu hna hi zoh sawhsawh awk an si lo zia chim nak can ka nei kho I Khuazing Pathian a min ka thangtthat.
Kan chimrel mi hnihkhat te le kan thlacam nak Khuazing Pathian nih kan theih piak seh law cozah le nawlnei tu hna thinlung ah rianttuan hram seh.

Ka phanh lo nak a sau ngai cangmi Washington DC, State Department, US Congress le hmun dangdang i meeting hmanthlak ka vun tar chih.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.