29.1 C
Hakha
Tuesday, March 31, 2020
More

    Rohingya ralzaam tilawng aa let i minung 15 an thi

    Ṭial Tharmi

    - Advertisement -

    Rohingya ralzaam khat dihlak in a phortu tilawng cu February 11 ah Bangladesh le Myanmar ramri rili Bay of Bengal ah aa let i a tlawmbik minung 15 an thi, tiah Bangladesh cozah nih thawng a thanh.

    “Nihnihni zingka ah mi ruak 15 kan char. Minung 71 cu an nungin kan khamh hna, a tlaumi zeizat an si ti hngalh asi rih lo,” tiah Bangladesh Ramri Hngak biachimtu Lieutenant Hayat Ibna Siddique nih Xinhua media ah a chim.

    “Tilawng aa leh hnu in minung zeizat dah rili kam tiang an i lio kho ti zong kan hngal rih lo.

    “Khat le khat an chimmi zat aa khat cio lo. A tlaumi zeizat dah an si ti hngalh khawh asi lo. A tlaumi cu an um ko.

    “Tilawng cu Malaysia kal aa thawhmi a si. Bay of Bengal rili i St Martin tikulh pawngah aa let. Nikhatni zaan lole Nihnihni dei hlan hrawngah aa let,” tiah a chiim.

    Thawng an thanh hna cangka in Bangladesh ramri hngak ralkap pawl cu mi bawm dingin a hmun ah an kal colh. Mi ruak pawl cu Bay of Bengal rili cungah an rak i vuan.

    A thimi an karh kho men, tiah Bangladesh cozah nih a zumh. Mi Kawl le Khamhtu pawl nih an kawl cuahmah hna lio asi. Ngatlai pawl le cozah i bawm in minung tam taktak nih an kawl cuahmah hna.

    Vanchiat a tongmi ralzaam pawl cu Myanmar ram Rakhine state in Bangladesh ram ah a zaam i Cox’s Bazar ralzaam camp ah aa dormi pawl an si. Hika ah Rakhine state in a zaammi Rohingya ralzaam 1 million hrawng an um.

    2017 ah Myanmar cozah ralkap nih Rakhine state um Rohingya pawl a thah nawn hna caah minung 700,000 leng Bangladesh ah an zaam. — Xinhua le Al Jazeera

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.