Minung Pakhat

Aizawl khuapi kan luh laiah kan driver pa nih hika tiang long motor a kal khawh lai cah nan tum dih hau ko. Nanmah le thilri cio kha nan i phurh hau lai a kan ti. Zei thil ko dah cang hnga tiah ka thilri cu kan vun i bei i tlawmpal ka vun kal ah khin mibu tampi umnak cu ka phan.

Mi cu an phun supmap i an phun cuahmah ko hna. Mizo holh a theimi ka si nain an i ceihmi ka thei thlu lo. Keimah he kan i hlat deuh ruang longah si lo in, a phunmi an tamtuk caah a ho bia dah ka ngaih set lai ti ka theih lo caah le an mithmai ah thin phan thlalaunak le ngaihchiatnak mithmai ka hmuhmi nih ka lung a ka tuaitam ca zongah a si ve.

Bia an chim pah bu in an i chawk lulh ko hna. Vun thut khawhnak ding hmun um ko hmanh sehlaw a hohmanh an thu lo. A dirmi hna cu tuah ding theih lo caah a dirmi an si. A chawkmi hna zong zeiti hleiin kan cawlcaang ve lai ti a hngal lomi thiam an si hna i panhnak hmun ngei lem tung lo in an i chawk lulh ko.

Khua ka cuan i ka hna ka tun tikah ik thluahmah in a tapmi an um i aa sum kho deuh pawl mitthil long aa hnawt i a aw achuak lomi an um fawn. A tap lomi hna hmanh an mithmai ka vun zoh hna tikah mit thatuk ti lo mi hna hmanh nih fiang tein vun hmuh khawh ding in an mithmai ah tihphan thlabarnak le ngaihchiatnak cu hmuh khawh a si.

Ka thlang leikam ah nu rual deuh ummi ka vun zoh hna i a cheu cu vawlei a zoh ngam ti lomi bantuk in an mit an i huh i a cheu nih an hna an i phih i a cheu nih thinphang ngai bu in thawngthanhmi an ngai.

Thawngthanhtu nih ruak mah cu zat cu an lak khawh cang hna tiah thawng a vun thanhmi ka theih bak in ka lau tuk ve cang i ka chak lei kamah vawlei nih aminhpimi hna le lung an laknak nih a nenhmi hna ruak an chiah ko mi hna ka vun hmuh cu tuksumza a si zia chimnak ding ah biafang ka hmu kho lo.

Culioah, miruak latu hna nih nawncek lak in Jeans bawngbi aa hrukmi an vun zonh lenmi kan zoh thup ko hna. Micheu nih thin domh bu le din tein thaw chuak buin kan zoh ko. A zohtu dihlak nih hin thlacam bu tein kan zoh dih. Hmun rem deuh ah an vun ihter i kan zoh thup ko lioah rianrang in sizung lei ah tlippi uu an ti.

Minute 20 hrawng a ruah hnuah khin Laud speaker in biaphuangtu nih ngai u kaw, tunai i vawlei min karlah in an vun chuah mi vawlei nih suimilam cheu tluk a nenh cangmi pa kha tlang val a si i a nule pa min cu annih an si a ti hnu ah a aw a vun i thianh ta i a aw avun santer i lunglawmh tukding a simi cu a nunnak a um rih i kan chanh manh ko lai a ti.

A theitu vialte kan i lawmh tuk ahhin kutbengh le au le vio thawng in a khat. Haleluiah tiah a aumi le lawmhnak biachim in thlacammi zong an um. Mi holhtlawmmi hna hmanh biachim loin an um kho loh i lawmhnak bia an chim.

Mipi kan i lawmhtuk mi kha ka ruah tikah tlangvalpa kha an theih hngalhmi le an sahlawh rualchan a si caah a si lem lo. Aa lawmtukmi hna nih khan pumpak in tlangvalpa kha an hngal lo nain an lawmhpi tuknak aruang cu mi pakhat nunnak hi arak sunglawi tuk i a thi ding bak ah ruahmi a nun caah khan a si.

Keizong nih ka lawmhpi tuk ve i anun ruangah hi vialte minung kan i lawmhmi hi hei hngal in a mitnih kan lawmhpi mi hi hmu seh law a nunnak a tangmi te khan man ngei ngaiin a hman cang hnga mu ti ka ruah ah minung pakhat i aman a fak zia ka ruat i kaa fiang tuk.

Ka theih lomi pa a nunnak an khamh manh ruang ah khatluk in kan lawmhpi bantuk khan vawlei i na nun ve rih ruang bak ahhin lawmhpitu tampi na ngei. An in dawt caah le an caah thiltha tampi na tuah ruangah a si lem lo. Na nun ruang bak ahkhan an i lawm ko. 

Mui dawh ruang le pumrua that ruang le midang caah thathnemnak tampi ngeih ruang zongah a si lo. Minung pakhat kan si i kan nun ruang bak ahhin aa lawmmi an tam pi. Minung pakhat kan si ruang bak ahhin kan thih ahhin ngaihchiami an tam pi.

Mah cucu micheu nih an theih tawn lo caah kei vawlei ah kan nun ve hi zeihme san tlaihnak um? Dawtu ka ngei lo, hlamtu ka ngei lo lawmhpitu ka ngei lo tiah i ruah sual in a huaha lo mi kong men ah an nunnak anmah tein an i la tawn. Pathian nih minung hi a ser tikah a mah lawng um dingin aser lo bantuk in a ho kan si hmanh ah kan i herh dih i dawtu ngei lo a hohmanh kn um lo.

Sport na thiam lo hmnh ah a thiammi kut bengh piaktu ah na tha hnem i hlasak na thiam lo zongah a thiammi an sak dih ah kut bengh piaktu le thazaang petu na si. Biachim thiammi na si lo hmanh ah an bia chimmi ngaitu ah na tha hnem tuk rih. Midang caah na thathnem lo zong ah na chungkhar le unau caah na tha hnem tuk rih.

Atu i na thathnemnak na theih lo zongah, hmailei ah thahnemnak na ngei kho tuk rih. Minung pakhat i anunnak a man asunlawi zia a thei fiang tu nihcun an nunnak hi “Minung pakhat” si ding in an hman. Minung pakhat na si. Na man a sung tuk ti hngal law na nunnak hi, Minung pakhat si dingin hmang.

Caṭialtu: Rev. Tuan Peng Thang