29.1 C
Hakha
Tuesday, March 31, 2020
More

    Rev. M. Thawng Kam nih Rev. Dr. Thlaawr Bawihrin chimmi kong a ttialmi

    Ṭial Tharmi

    - Advertisement -

    Biachim le Biangaih — Rev. M. Thawng Kam


    Lai phungthluk ah, “Survorh thiamlo mah lukhuh, biachim thiamlo mahkung tlung,” ti a um. Solomon nih, “Ruah set loin chim mi bia nih naam chunh bang in mi a chun,” (Prov. 12:18) tiah phung a thluk. Biachimtu nih ralrin a herhnak an si. Biachimtu cung lila ah fahnak a tlung sual tawn.

    Biachim thiam cu duh dih a si nain zapi tlinh mi a si lo—zeititha. Cucaah, ralringte le ruahcia bute chim ahcun palhnak a tlawm deuh suammau ve. ‘Awkaneem nih ruh hmanh a kiah khawh’(Prov. 25:15) tiah Solomon nih a chim than thiamthiam. Hruaitu ca lebang ahcun a herh khun tuk. Thinhun bu le huatnak ngeibu biachim lebang cu chim ding a um ti lo. Rawhnak aa ruaih a si ko. Biachimtu nih a chim mi bia cung ah tuanvo nganpi a ngeichih zungzal.

    Biachimtu cung ah tuanvo nganpi a um bantuk in biangaitu leikap zong ah tuanvo nganpi a um ve thiamthiam. Biangaitu nih hin a ngaih mi kha a va chimchin than tawn ca ah a si. Cucaah, ralrin a hau tuk ve. ‘Lamkaltu thalo nih harnak chung ah a luhpi tawn hna’ (Prov. 13:17) ti a si.

    Caponak hmun i chim mi bia a um, hawikom karlak biachim a um, cawnpiaknak hmun chim mi a um, ram le miphun kong chimnak a um, dawt ruang lungfahnak chim mi a um. Kha vialte kha a hmunhma le a pawngkam nih an hrilhfiahchih tawn.

    Caponak hmun bia cu caponak in ruah a herh. Hmundang le caan dang ah biatak bantuk in va chim than lo a hau. Chimhhrinnak le cawnpiaknak nih sullam dang a ngei ve. Dawtnak bia hmanh hi a neem zungzal bal lo. Dawt ruang ah pei chungchuak fale zong kan vuak theo hna cu.

    A pawngkam thil chimchih ti lo i mah huat mi/duh mi zawnte lawng lak ahcun sullam dangpi a chuahpi. Biangaitu nih biachimtu chim duhnak kha biapi ah ruah a herh. Mah duh in rak i kuaih ahcun damnak a chuak kho lo.

    Mifim le hruaitu hna zong nih a zungzal in chim an thiam tawn lo. An palh sualnak le an thiamlonak a um tawn. Cu zong cu ‘aa… a thiam thlu kho ve lo …’ ti i ruahpiak khawh ahcun palh mi hmanh a dam than tawn ko. Palhnak i hmaimilh cio hi minung sunparnak a si (Prov. 19:11).

    Naihrawng CBCUSA GS Dr. Thlaawr Bawihrin biachim mi kong i thil linsa a chuak mi hi kaa nuam hrimhrim lo. Ka ngaih a chia. A chimtu le a theichintu karlak a hla tuk ti a lang.

    BT meeting lio ah Pu Dr. Salai Lianhmung Sakhong le Pu Salai Ngai Sak nih kan miphun kong an kan chimh. Cu lio ah GS Dr. Thlaawr Bawihrin nih kan miphun kong ah duhfak ngai in a lungfahnak a chim mi a si. Mindat kong a chim, Matupi kong a chim, Zotung kong a chim. Nehsawh thlanglamhnak in a si lo, thleidannak in a chim mi a si lo.

    A bia a dongh tiang ngaih ahcun cucu fiang tein a lang ko. A theitu vialte nih miphun dawtnak in a chim ti kan lung a fiang. Cu a chim duhnak cu la loin mah siaremlonak zawnte lawng vun cawih zau i midang sin vun chimchin tik ah cun a chim duh mi he aa hlat ngaingai cang.

    Biachimtu he biangaitu he kan tuanvo i theih cio ah a tha tuk hnga.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.