Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah kan theih.

Mah kong he pehtlai in ACR Coordinator le Acting Chairman James Bawi Thang Bik kan chawnh i, “nizaan le tuni ah facang bag 203 le chiti bag 50 cu ACR member pengtlang 13;

1. Asho Chin Refugee Committee
2. Chin Kanpetlet Community
3. Falam Christian Fellowship (Kuchai Lama)
4. Mindat (K’Cho Ethnic Association Malaysia)
5. Lautu Christian Fellowship
6. Mara Community Committe (Kepong)
7. Matu Social Organization
8. Malaysia Mizo Community
9. Paletwa Khumi Community
10. Senthang Christian Fellowship
11. Siyin Organization of Malaysia
12. Zophei Christian Fellowship le
13. Zotung Christian Felow sinah kan phawt,” tiah a chim.

“Mah hi UNHCR bawmhnak asi lo. Ka hawile Malaysia le ramdangmi sinah bawmh ka halmi si. Cheukhat cu tangka in a kan kuat i cheukhat cu facang bag tlawmpal a kan bawmh. Tangka in facang le chiti kan cawk chap i kan phawt hna hi si.

“Kepong khua um Chin chungkhar a harsa tukmi tlawmpal cu nizaan ah RM250 le RM200 cio in RM700 kan bawmh hna.

“Cun, Malaysia rammi Pastor Michael Moey le a hawile nih RM4,750 a kan hlut. A harsa khunmi chungkhar pawl RM200 le RM250 cio in kan phawt hna.

“Pastor Michael Moey nihhin liamcia zarh zong ah arsa pum 250 in voi 1 le pum 550 in voi 1 a kan hlut cang. A harsa deuhmi Chin chungkhar 800 kan phawt hna.

“Mehmuai (anhringso) tampi zong a kan hlut i a harsa deuhmi chungkhar 89 kan phawt hna.

“ACR kan member hi 25,000 in 30,000 kar an si. Malaysia cozah nih lengchuah a phih ruangah kannih refugee pawl cu lam hla kal kan ngah lo i lam hla um kan member pawl cu kanmah nih bawmhnak va pek an ngah lo.

“Manjung, Subang, Perak le Kepong um kan member pawl cu UNHCR sinah bawmh kan halpiak hna i Majung um chungkhar 5 cu rawl an bawmh cang hna. Adang zong an bawmh ve te hna lai. UNHCR nih direct in bawmh si loin mi bawmtu sinah bawmh a hal chin i NGO le mi bawmtu pawl nih an bawmh hna,” tiah a chim.

James hi Chin ralzaam bu 5 komh;

1. Alliance of Chin Refugees (ACR)
2. Zomi Association of Malaysia (ZAM)
3. Chin Refugee Committee (CRC)
4. Falam Refugee Organization (FRO) le
5. Dai Community in Malaysia i president zong asi.

“ICC member dihlak lole Malaysia um Chinmi dihlak hi 50,000 hrawng kan si. 2018 hrawng cun 40,000 hrawng lawng kan si nain Paletwa ral ruangah a hung zaam tharmi an tam tuk i atu cu 50,000 hrawng kan si ṭhan cang,” tiah a chim.

“ICC sinah bawmh kan herh tiin min cazin a pemi Chin ralzaam chungkhar 1,633 (milu 5,000 hrawng) caah UNHCR sinah bawmh kan halpiak hna nain atutiang bawmhnak an ngah rih hna lo.

“Cucaah, kanmah tein kan theihhngalh sinah bawmh kan hal i atu bantukin a harsa deuhmi pawl kan bawmh hna hi si,” ati.

“Khrih ah unau kan si ti an langhter,” tiah bawmtu cungah aa lawmhnak a chim.

Malaysia um Chinmi 50,000 hrawng cu an pengtlang cio in acunglei langhtermi ralzaam bu 5 ahhin an i pehtlai cio. ACR member an tambik, a changtu ah ZAM, CRC, FRO le Dai member an si.

Vawleipi pulrai a simi Covid-19 zawtnak karh hlah seh tiin Malaysia cozah nih March 18 in April 14 tiang lengchuah a phih caah hohmanh rianṭuan khawh asi lo i fa tam a ngeimi chungkhar, nu/pa hmei le pehtlai tein rian a rak ṭuan kho lomi Chin ralzaam tampi cu rawl ei awk kongah lungrethei vansang in an um.