Rakhine khuabawi nih Chinmi 3 hramhram in Buddhist a luhter hna
2018 ah Christmas tuah aa timmi Buddhist nih an velh hna lio

Rakhine state, Ann peng i Padekyaw khuami Chin khrihfa 3 cu “Buddhist lut dingin min nan thut lo ahcun khua in kan tthawl hna lai” tiah khuabawi nih a tlerh hna i an duh lo buin min a thut ter hna.

Padekyaw khuabawi U Tin Shwe Maung telh in khua nupa U Htun Lin Aung, U Htun Maung Ni, U Kyaw Tin Aung, U Nga Swe le U Aung Htay hna hruainak in May 24 zaanlei 3pm ah Chin khrihfa U San Swe Maung le U Aung Thein cu khua chung phungki sianginn ah an auh hna i phungki pa hmai ah ‘Buddhist kan lut cang’ tiin biakamnak minsen an thut ter hna.

A thaizing May 25 ah, Chin khrihfa U San Tin Aung zong phungki pa nih a auh i khaubawi zungkhan ah ‘Buddhist lut dingin minsen a thuter’ ve.

Buddhist nan luh lo i Khrihfa biaknak nan zulh rih ahcun khua in tthawl nan si lai, tiah an tlerh hna i hramhram in min an thut ter hna hi si.

“May 24 zaanlei 3pm hrawngah khuabawi le khua nupa hruainak in keimah le U Aung Thein cu khua phungki sianginn ah a kan auh i phungki pa hmai ah Khrihfa in Buddhist ah kan i thleng cang tiin biakamnak min nan thut lo ahcun khua in kan in tthawl hna lai a kan ti,” tiah min thutter a tongmi pakhat nih a chim.

“Kan khua ah Khrihfa umnak nawl kan pe hna lo tiin a kan tlerh i hramhram in a kan thut ter caah kei zong ka duh lo buin ka thut piak ve hna,” tiah a chimchap.

“Atu hi avoi 3nk hitin a kan tuah si cang. 2018 July thla zongah Khrihfa pawl a kan tlerh i Buddhist lut dingin hramhram in min a kan thut ter. Kei cu min ka rak thut duh lo i Hing Yuat khua ah kai tthial,” tiah Buddhist luh a duh lo ruangah Padekyaw khua in Hing Yuat khua ah a zaammi Ko Tin Phe nih a chim.

Khrihfa pawl hitin an hrem hna ruangah Padekyaw khua in khua dang ah a peemmi le a zaammi an um pah len cang.

Atu bantukin Buddhist pawl nih a phunphun in Khrihfa pawl namneh, tukvelh le a bubu in velh kong hi cozah zung ah an report peng ko nain nihin tiang cozah nih fakpi in a chimhhrin piak bal hna lo.

Padekyaw khua hi inn 200 leng a um. Khrihfa inn 11 an si. Buddhist pawl nih a phunphun in an namneh hna, an velh hna, bia chiachia in an ti hna i a phunphun in an tlerh peng hna. — CHRO

2018 zongah Christmas tuah aa timmi Chin khrihfa pawl Buddhist nih an velh hna – ka hmet law relchap