Puaisa Nge Nge ruangah Malaysia in a tlung Chinmi 2 thong an tla

Puaisa Nge Nge ruangah Malaysia in a tlung Chinmi 2 thong an tla

Malaysia in a kirmi Chin refugees Salai Van Ceu Thawng, kum 28 (Hakha) le Mai Om Lu (Mindat) hna cu puaisa Nge Nge nih a hlen hna ruangah Yangon Airport ah lahwahkah nih an tlaih hna i atu hi Insein Thongin ah an thlak hna.

“June 10 ahkhan Yangon Airport ah lahwahkah upadi in an tlaih hna,” tiah Salai Van Ceu Thawng a pa nih a chim.

“An UN card a thi, cun ram thumnak an kal kho ti lo. Malaysia ah palek tlaih an ttih ruangah an kir hi si. An puaisa nih passport deu a pek hna ruangah an tlaih hna hi si,” tiah a chim.

“Salai Van Ceu Thawng cu phungninglo in Malaysia ah a kal. UNHCR nih Chin refugee hlawt ding a ti ruangah Kawlram tlun aa tim nain passport a herh cang. Malaysia ah a ummi puaisa Nge Nge nih passport a tuahpiak, nain a deu a rak si ruangah an tlaih hi si.”

“Puaisa nih a hlen. Hmatpungttin le chungkhar cazin vialte cu Viber in kan kuat dih ko. Puaisa nu nih Tanzung ah a kalpi lo, inn ah a kutdong a namter. Tanzung ah ngunkhuai/tax zong an pe lo. Passport deu pi cun a rak kuat diam ko,” tiah a chimchap.

Chin ralzaam 2 hna cu Lahwahkah Upadi Dal 13 (1) le Passport Deu Upadi Dal 420 in tazacuai an si i atutiang Yangon i Insein Thonginn ah an thlak peng ko hna.

“Tazacuai an tonnak upadi hi aamahkhan piak a ngah lomi si ruangah thonginn ah hren an tonnak si. Adang a ra kirmi pawl zong hi bantuk an tong ve sual lai ti ka phang ngai,” tiah an sihni Pu Ngai Sak nih a chim.

Vanlawng in tlun kan i timh vaivek ahcun ahohmanh puaisa hmang hna hlah usih. Hmatpungttin le chungkhar cazin kha Myanmar Tanzung ah ap in zarh 2 in thla 2 karlak ah tlun khawh peng a si. – BNI & Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.