President Trump ‘phuah dingin tazacuai usih’ tiin Hlutdaw Niam ah vote an thlak nain an sung

US President Donald Trump cu ‘phuah dingin tazacuai (impeach) usih’ tiin zahan ahkhan US Hlutdaw Niam ah vote an thlak nain an sung.

Mah biatung a dirhtu cu Democrat MP/Rep. Al Green asi. Anih hi Texas state ah MP/Rep. a ngahmi pa asi.

“President Trump nih MP nu 4 a timi hna bia kha miphun thleidan asi pinah, sualnak ngan tuk a tuah bak si. Cucaah phuah dingin tazacuai usih…” tiin Hlutdaw Niam ah a chuahpi caah vote an thlak.

MP 332 nih ‘a hau lo’ tiin an vote i MP 95 nih ‘cuai ko usih’ tiin an vote. MP tam deuh nih cuai an duh lo caah cuai lo dingin an fehter.

President Trump nih Democrat MP nu 4 cu ‘cutin khatin US cozah rianttuan seh tiah US mipi nan chimh lenmi hna nak cun, a rawk dih cikcekmi le sualnak in a khatmi nan ratnak ram ahkhan va kir ulaw remh va bawm deuh hna uh’ a rak ti hna.

Mah cu Democrat pawl an i faksak tuk i Nihnihni ahkhan Hlutdaw Niam ah ‘Trump bia hi miphun thleidan asi maw si hlah?’ tiah vote an thlak i ‘asi ko’ tiin an fehter.

President Trump nih a phomhmi Hlutdaw Niam i Democrat MP nu 4

Mah hnu ah, atu bantukin ‘phuah dingin tazacuai usih’ tiin vote an thlak tthan i an sungh hi si.

Democrat MP vialte nih “Trump bia cu miphun thleidan asi” an ti dih ko nain “phuah dingin tazacuai” cu Democrat MP tampi zong an lungtling lo. Hlutdaw Niam hruaitu nu Democrat MP Nancy Pelosi zong nih ‘phuah dingin tazacuai lo dingin’ a vote ve.

Fianternak: Chinmi cheukhat nih ‘impeachment’ hi ‘President phuah’ ah kan ruah tawn. Impeach (impeachment) cu phuah asi lo. ‘Phuah dingin tazacuai’ asi.

Tahchunnak: Nizaan ah President Trump impeach dingin an vote mi kha ‘yes’ ti dih hmanh hna sehlaw President Trump kha an phuak colh lai lo.

Hlutdaw Sang (Senate) nih bia an ceih hmasa lai i MP cheu-thum cheu-hnih nih ‘a sual ko’ an ti lawngah phuah asi lai.

Liamcia U.S. President 2; Andrew Johnson le Bill Clinton zong Hlutdaw Niam ah ‘impeach’ dingin an rak vote i ‘impeach’ an si nain Hlutdaw Sang (Senate) nih ‘an sual lo’ ati caah phuah an si lo.

Impeach = phuah dingin tazacuai

Cun, ‘MP’ tiin kan ttial tikah US Chinmi cheukhat kan siahrem lo ngai. Kan ca hi vawlei cung ramkip in relmi asi caah Chin/Laimi vialte i fian khawhnak dingin ‘MP’ tiah kan ttialnak asi.

House of Representatives cu Kawlram i Pyithu Hlutdaw (Lower House) he ai khatmi asi caah ‘Hlutdaw Niam’ tiin kan ttial.

Hlutdaw Niam chungtel pawl cu US, Australia, tbk., ahcun ‘representative’ tiah an auh hna i Hlutdaw Sang (Senate or Amyotha Hlutdaw in Myanmar) chungtel cu ‘senator’ tiah an auh hna nain Kawlram, UK le ramdang tampi ahcun ‘MP (Member of Parliament)’ tiin an auh hna.

Cucaah, Kawlram le ramkip um Chinmi vialte caah i fian a fawi biknak hnga ‘MP/representative’ le ‘MP/senator’ tiin kan ttialnak asi.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.