President Trump nih US Vanlawng Ralkap hruaitu dingah nu a thim

Washington: US President Donald Trump nih, “US Vanlawng Ralkap (Air Force) hruaitu dingah Barbara Barrett hi ka chuahpi,” tiah thawng a thanh cang.

Kum 68 nu Barbara Barett cu 2008 in 2009 tiang Finland ram US Tanzung lutlai a rak ttuan. Arizona state ah a ummi sipuazi tama a si.

Vanlawng kong research tuahnak zung The Aerospace Corporation zongah 2017 tiang chairwoman a rak ttuan.

Trump nih, “Barbara hi Air Force hruai a thiam taktak lai!,” tiah Twitter ah a ttial.

Liamcia kum 3 lio ah US Air Force nih an thazaang an piah lio video

Sihni le test pilot zong a rak si balmi Barrett cu US ralkap ruahnak cheutu zung Rand Corporation zongah member a rak si bal.

A vapa Craig zong technology company tumtlang taktak a simi Intel ah CEO a rak ttuan balmi a si. An nuva in Republican party caah tangka a hlu lengmangmi an si.

Barrett cu 1994 ahkhan Arizona state cozah lutlai i cuh dingin aa rak zuam ve nain Republican party chuahpimi/nominee a rak ngah kho lo.

Trump nih a chuahpimi cu US Hlutdaw nih a fehter lai maw fehter lai lo ti chim khawh a si rih lo.

Atu lio US Vanlawng Ralkap hruaitu nu Heather Wilson dinh ai timh caah atu bantukin Trump nih amah rian changtu dingah Barrett a chuahpi nak hi si.

Wilson nih ‘kai phuak lai’ tiin March thla ah phuahnak ca a rak ttial.

US Ralkap Vuanci Jim Mattis zong Syria le adang kong tete ah Trump he an lungput ai khah lo caah aa phuak i atu hi Patrick Shanahan nih caankarlak Ralkap Vuanci a ttuan chung. — AFP