16.5 C
Hakha
Wednesday, August 12, 2020

Paletwa khua pawng i kahdohnak ruangah pawngkam khuami 500 hrawng khuapi lei ah an zaam

- Advertisement -

Nizaan ahkhan Paletwa khua pawng ah Kawl ralkap le Rakhine ralkap (AA) an i kap i Paletwa khua pawng um khuate 4 in khuami 500 hrawng cu Paletwa khuapi lei ah an zaam tiah kan theih.

“Khua in a zaammi hi nifatin ngawt in an um. A tlawm le tam lawng aa dang. Atu Paletwa khua a phan tharmi hi minung 500 hrawng an si. Cazin kan lak lio a si. Camp hmanh bawlung tual ah tuah hau phun a si.

“Khuami le committee pawl i bawm in khua kan khan lai. An thil zeihmanh a la kho tthan ding dirhmun an si lo. Atu a rak zaammi pawl hi khua chungah bomb a tlak ruang ah le pehzulh in raltuknak vanlawgn a zuan caah an um ngam ti lo i an rak zaammi a si,” tiah Paletwa MP Salai Myo Theik nih a chim.

“Nizaan zong ah Paletwa khua nichuahlei ah a ummi tlang le nitlaklei ah a ummi tlang ah meithal kah thawng kan theih.

“Zeitin an i kah ti cu fiang tein kan thei lo. Raltuknak vanlawng a zuanmi zong kan hmuh. Pawngkam khuate 4 in khuami pawl an rak zaam hna. Minung 400 leng an si tiah kan theih. Atu lio cu lam an phih lio si caah dinei awk ah harsatnak an tong kho, cu caah bawmhnak pe hna seh ti kan duh,” tiah Paletwa khuami pakhat nih a chim.

April 7 zaanlei ah Paletwa peng, Hnanchaungwa khuate ah Kawl ralkap nih vanlawng 2 nih bomb an kah ruangah khuami 7 an thi, 8 hliam an tong.

AA le Kawl ralkap kar an i kah ning a zual chin caah ralzaam zong an tam chin lengmang i Kawl ralkap nih vanlawng bomb a hman ruang ah khuami a thimi zong an tam chin.

Ramkip tanzung in palai pawl nih raltuk cu ngol in atu lio Covid-19 zawtnak lei ah i biatak deuh dingin an forhfial hna. – Chin World

- Advertisement -

Ṭial Tharmi

Ramdang khrihfa nih ACR sin in Chin ralzaam tampi an bawmh hna

Dawtnak ngei ramdang khrihfa pawl nih Malaysia um Chin ralzaam tampi caah ACR (Alliance for Chin Refugees) sinah bawmhnak an pek, tiah...