Myanmar ralkap le AA i kah ruangah Paletwa khuapi a phanmi Chin ralzaam 700 leng an si cang.

Atu ah i kahnak cu a um ti lo nain June 7 le 8 ah Paletwa khuapi in meng 7 leng a hlatnak khuate pawng ah AA le Kawl ralkap cu miakpi le meithal in an i kah ruangah Thae Ma Chaung Hte, Thae Ma Chaung Wa, Pein Hne Ta Pin, Kyauk Pyin Htaunt, Kyway Thaung le Laung Tin khuate in chungkhar 143 (minung 722) cu Paletwa khuapi ah an zaam.

Paletwa khuapi phanmi Chin ralzaam 600 leng an si cang

Chin ralzaam pawl cu Paletwa khuapi ah a ummi NLD zung, USDP zung le biakinn ah an umter hna. Cheukhat cu chungkhat, hawikawm inn ah an um.

Paletwa peng zatlang zohkhenhnak bu nih Chin ralzaam hna cu nikhat ah chungkhar pakhat caah kyat 2,000 le minung 1 caah facang pawng 2 in a bawmh hna.

“Mi nih pekmi bawmhnak kha aa zat cio in kan pek hna. Nizaan ah biakinn pakhat nih kyat ting 5 a bawmh hna. Chin state cozah zong nih facang tun 500 a bawm hna. Atu tiang ahcun a tlamtling rih ko.”

“Nain, cheukhat cu hnipuan a hlei in an rak i phurh lo ruangah caan sau deuh ahcun harnak zong a um kho te men. Zei caan an um lai zong hngalh a si rih lo,” tiah Paletwa peng zatlang zohkhenhtu bu rianttuan Kyaw Khah nih a chim.

Paletwa peng zatlang zohkhenhtu bu cazin ning ah a hlan um ciami Chin ralzaam hi minung 2640 an si i atu 722 he fonh ahcun ralzaam 3000 leng an si cang. _ Khonumthung

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.