Obama le Hillary thah dingin ralkap tinttan a pemi pa an tlaih

Obama le Hillary thah dingin ralkap tinttan a pemi pa an tlaih

Nizaan tihni ah US-Mexico ramri ah phungninglo ramdangmi 300 leng a tlai i ramri hngak ralkap sinah a aptu hriamtlai bu ‘United Constitutional Patriots (UCP)’ cu Barack Obama le Hillary Clinton thah dingin raltuk an rak cawng, tiah biaceihzung catlap chungah aa ttial.

UCP hriamtlai bu hruaitu kum 69 pa Hopkins cu “meithal ngeihnak nawl onh a si lo buin a ngeih…” tiin biaceihzung ah taza an cuai.

UCP nih ramri ah phungninglo ramdangmi 300 leng an tlaih hna i ramri hngak ralkap sinah an ap hna lio video cu online ah an tar i fak piin thangchiat an ton ni tlawmpal hnu Zarhteni ahkhan New Mexico state ah FBI nih an tlaih.

Angki rang hi UCP hruaitu Hopkins cu a si. A pawng i uniform aa hrukmi hi UCP member a si.

Nikhatni ah Las Cruces biaceihzung ah an chuahpi i taza an cuai.

UCP nih “US Ramri hngak ralkap kan si” tiin phungninglo in a rung lutmi ramdangmi pawl an ti hna i an tlaih hna hnu ah US Ramri Hngak Ralkap sinah an ap hna. New Mexico state cozah lutlai nih “UCP nih phungninglo ramdangmi tlaihnak nawl pekmi an si lo…” a ti. – atang CNN video

Biaceihzung i taza an cuainak catlap chungah “Obama, Hillary Clinton le George Soros hi Antifa group a ttanhtu an si caah anmah thah dingin UCP cu raltuk kan cawng, tiah Hopkins nih a chim,” ti zong aa ttial.

“Kahin hriamtlai bu pialsual an um…” tiin pawngkam mi nih a thli tein an rak report ruangah 2017 November thla ah FBI nih Hopkins a inn cu an rak check i a chungah meithal he a hawile tampi an rak um. Hriamnam tampi an hmuh.

FBI nih meithal zun 9 le meithal thliri tampi an rak tlaih. Mah case in cun atu hi taza an cuaimi si.

Media tampi nih cun “US ram New Mexico state le Mexico ramri ah meithal hmuah in phungninglo ramdangmi a tlaih hna ruangah FBI nih an tlaih…” tiin an ttial.

Mexico le US ram New Mexico state ramri ah phungninglo ramdangmi 300 hrawng an tlaih hna i Ramri Hngak Ralkap sinah an ap hna

UCP hruaitu Hopkins cu liamcia caan ah upadi voi 3 a rak buar bal ruangah meithal i ngeih lo dingin cozah nih nawl rak pekmi a si.

Hopkins nih “ramri ah ka ttapeh pawl nih phungninglo ramdangmi an tlaih hna lio ah kei cu meithal zong kaa put lo,” tiah a chim.

Hopkins a sihni Kelly O’Connell nih “zei ruang dah FBI nih a inn an check kum 2 dengmang hnu ahcun an tlaih i taza an cuai? FBI an rianttuan ning a diklo. FBI nih an rak tlaihmi meithal pawl kha Hopkins ta zong an si lo” tiah thawngla pawl sinah a chim.

“Taza an cuainak konglam ka rel tikah, a hawile he ramri ah phungninglo ramdangmi an tlaihmi hna ruangah taza an cuaimi si lo. Meithal ngeih ruangah an cuaimi si,” tiah a chimchap.

UCP aiawh biachimtu Jim Benvie, kum 43

“Hopkins hi Vietnam Ral lio ahkhan US ralkap a rak ttuani atu hi a pensen mi a si. Ralkap sakhan ah rawl an rak chuantermi si. Tutan ah hitin an tlaih cu lih in sual an phawtmi si,” tiah UCP biachimtu Jim Benvie nih a chim.

“Phungninglo in US a rung lutmi ramdangmi pawl ramri ah kan tlaihmi hna cu upadi nih a onhmi citizen’s arrest asi.

“Kan group chungtel pawl hi ram dawtu lawngte kan si. Ralkap le palek hlun lawngte kan si, kan ram kan dawt ruangah zaanghlei cawi tein palek kan bawmhmi hna si,” tiah a chimchap.

Hopkins a sihni nih, “phungninglo in US a lutmi pawl an tlaihmi hna cu palek le ramri hngak ralkap an bawmhmi hna si,” tiah a chim ve.

Hopkins cu palek nih an thlah rih lo. April 29 ah biaceihzung ah an chuahpi tthan lai. A sual tiin bia an khiah ahcun kum 10 tiang thongthlak a tong kho. — The Washington Post, Daily Mail, CNN le The Guardian

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.